فالتصديق لابد منه لجريان الحياه
فاذا سرت فى طريق واعترضتك لافته مكتوب عليها ممنوع المرور لا بد وان تصدق واذا قالولك ان الارض كرويه لابد وان تصدق واذا طلبتنى فى التليفون وقالولك مش موجود برضه اوعى تصدق
ولكن هل يصبح للحياه طعم اذا سارت صادقه كل حاجه حقيقيه ولافيش كلمه كذب واحده
تخيل كده معايا لو واحد انا لابحترمه ولا بعزه وببعتله جواب هقوله ايه فى اوله
هقوله عزيزى وفى اخر الجواب هقوله مع خالص احترامى وتقديرى
ولا هقوله فى الاول انت ياللى ماعرفكش وفى نهايته اقول انا لا احترمك لانى لم اعرفك هيكون هناك مشاكل
والحياه لايمكن ان تكون كلها جد الجد يقتل النفس والهزار يعيد اليها الحياه
ولذا اخترع البنى آدم عيدا للكذب عمره نصف يوم يبدا من نصف ليله اول ابريل الى منتصف نهاره يجوز للناس فيها استغفال بعضهم دون عتاب
تعالى كده وخد هديه من صديق تيجى تفتحها تفرقع فى وشك وهديه من صديق اخر مش بتنفتح اساسا
يتصل بى فجاه وهو فى قمه الانفعال ويقوللى الحقنى ياعم انا مستنيك فى اخر شارع الهرم عند كباريه الفروكريتو وتعالى بسرعه انا فى ورطه كبيره اروحله على مله وشى بسرعه ومالقيش اى حد
او انك تلاقى شخص تانى تعرض لنفس المقلب وان جريده امريكيه نشرت انه فى حديقه كذا فى الساعه العاشره صباحا سيفتح معرض به خمسه الاف حمار فى مهرجان الحمير الدولى الاول
وذهب اللى صدق الخبر الى الحديقه وراوا الاف الحمير وطبعا المقصود بيهم اللى صدقوا الخبر
وحدث انه فى اول ابريل بعث احدهم مع مساعده بخطاب الى صديق فى اخر الدنيا مكتوب فيه النهارده اول ابريل
والمساعد بتاعه مغفل وقارفنى طول السنه وكان نفسى اعمل فيه حاجه فارسلته اليك حتى اقطع نفسه فوضع الصديق الخطاب امامه ونظر الى المسساعد الذى يتصبب عرقا
وقال له يبدو ان صديقى اخطا الجواب ده مش ليا الجواب ده لازم يكون النهارده عند مستر جون فى اخر واشنطن تخطف رجلك لحد هناك وتجيلى تانى
ومساعد مسكين اخر ارسله المدير الى مكتبه فى اخر الدنيا برضه ليبحث له عن كتاب اسمه لبن اليمام اصله بيشفى من العته بعيد عن السامعين والمقرئين مش مهم
المهم بعد ساعات من البحث والتنقيب نظر له صاحب المكتبه بضيق وقال له هو اليمام عنده لبن
ولكن اشمعنى ابريل بالزات
بيقولوا ان النبى نوح عليه السلام بعد ان صنع سفينته ارسل حمامه للبحث عن مكان امين يمكن ان ترسو فيه السفينه
فلما عادت الحمامه وانباته بان الطوفان ورائها سخرت منها بقيه الحيوانات والطيور التى كانت بالسفينه واتهمتها بانها كذبه ابريل
ولم يعد الكذب الان هو ان تقول مالم يحدث او تخالف الحقيقه وانما صار بعض الناس يتنفس الكذب ويعرق كذب
زى ما يقولك ده انا شوفتها قاعده معاه جميله بلاشك وحينما سالنى عن رايى فيها قلت له مش عارف حاسس انها كدابه
اعترض وسالنى كدبت فى ايه
قلتله لم تكدب فى شىء ولكن ردود افعالها كدابه
عينها كدابه وحركه ايديها كدابه وشعرها كمان كداب وانا مش قادر اصدقه
واسوا شىء حينما تحاول اى واحده منهم تبان صادقه وطبيعيه كده
ياساتر وياباى على البراءه المفتعله والبصمه المعموله كل شىء كده تحس انه مصنوع
ولكنها فى النهايه بتلاقى الاهبل اللى يصدقها ربما لانه هو كمان اكذب منها
وعلى راى شلاطه بتاع البطاطا اجرى يابن آدم جرى الوحوش يا تلحق اليكروباص يا متلحقوش
واحدث كذبه ابريليه سمعتها ومش عارف ان كانت كدبه ولا اشتغاله
القصد شائعه كبيره منتشره ان الزواج اعتبارا من الشهر القادم حيغلا يعنى ايه الكلام ده
قال لى العامل البسيط ان فى احباط ومراره ح يدفعوا الراجل ثلاثه الاف جنيه تامين
هو الشباب عارف يتجوز يا بيه لما يدفع التامين وعشان كده كله بيتجوز دلوقتى قبل القانون ما ينزل
لما سمعت الكلام ده ببص لقيت المخطوبين اللى لسه ماجهزوش بداوا يتجوزوا وبعد كده يجهزوا نفسهم براحتهم
دول ثلاثه الاف جنيه يابيه يعنى يجيبوا ويجيبوا ويجيبوا كمان بس ايه انا مش عارف اللى يعرف يبقى يقوللى
وشوف بقه ايه اللى حصل فى دمياط بلد الكرم
الجواز يا جماعه بقى بالطوابير كله عاوز يلحق نفسه ولعلمك المآذين بيشتغلوا برضه اصل ده الموسم بتاعهم
وفى كفر الزيات البلد كلها سهرانه بتتجوز على انغام ما تجوزينى يا ماما واللى شابك خلص الموضوع بدرى بدرى
واللى قارى فاتحه قوام قوام جاب الماذون
قلتله ياسيدى مايمكن تكون كذبه ابريل
قاللى وانا اعرف منين تقوللى كذبه ابريل والبسها انا فى مايو
وخرجت من عنده وانا اضرب كف بكف وعلى راى المثل قاللى الوداع قلتله قشطه !
وبيقولوا السكر حيغلا وامى تحول فى سكر وتشيل ويقولوا اللحمه حتغلا والكل الله ينور بيخزن
ولكن الجواز حيغلا ساعتها حتخزن ايه بس مافيش غير العروسه وتيجى تتجوزها تلاقيها بقت معطبه واللى يفرسك انك تلاقى الموديل الجديد بتاعها نزل فى السوق
مافيش غير ان الواحد يشد حيله كده ويتجوز اربعه فى الرخص ويخليهم هينفعوا
مافيش حاجه بتخسر فى زمانا ده وعلى راى المثل يا حلاوتك يا عنبه وانتى قاعده ع الكنبه
ولكن كيف صدق الناس الكذبه ده اذا كانت كذبه
الا اذا كان هناك نوع من عدم الثقه بينهم وبين المسئولين واحساسهم العبثى الغريب بان اى شىء يمكن ان يحدث
فعلها الحاكم بامر الله فى ايام الدوله الفاطميه حيث اصدر امره بمنع اكل الملوخيه
وصارت الملوخيه مثل المخدرات التى يعاقب عليها القانون
وضبط العسس ( العساكر يعنى ايامها )
عائله تجلس امام حله ملوخيه بالتقليه ونازلين لهط فيها
والحمد لله انها كانت ملوخيه خضرا
فالناشفه كانت عقوبتها اشد بكتير
معلش يا اخوانا على التاخير ده وطبعا اخوانا عايده على الجحافل العظيمه التى تتابع المدونه
الا وهى مدونه هندس
كنت بس مشغول حبتين تلاته كده بس ربنا يسهل ونرجع تانى زى الاول
تحياتى للجميع
بيبـــــــــو
هناك 18 تعليقًا:
طب اليى بيخلينا نصدق موضوع زى تسعيرة الجواز الجديده اليى شبه تسعيرة اللحمه ان الثقه ممسوحه باستيكه بين المواطن والحكومه وان المواطن عارف كويس انه بحياته بعياله اليى حتى لسه مجوش بيهونوا على حكومتنا الرشيده فى ثانيه
انما لما اصدق كدب حد اعرفه بيكدب عليا هل حب زياده وثقه فيه
ولاا عبط زياده وقلة عقل
نورت البلوجر من تانى
يااااااااااااااااااااااه
كل ده تأخير
احنا افتكرناك بعت المدونه ايام الغلى
لازم نصدق يا بيبو اشمعنى دى يعنى الى مش هنصدقها
ومش تغيب علينا كده تانى
اصل نصدق عليك انت كمان الاشاعات
تحياتى
weza
ياااااااااااة
متتاخرش تاني عليهم احسن
بتوحشهم اوووووووووووووي
بس ممكن نعرف كنت مشغول
حبتين تلاته ليه
ههههههههههههههههه انت مجنون يابنى عرايس ايه المعطبه وعنبه ايه اللى عالكنبه ههههههههههههه
يخرب بيت عقلك ههههههههههه
بص بقى الجواز غلى ماغليش محدش بيتجوز اساسا اليومين دول
ومش مسأله ماديات مسأله نفس ههههههههههه
عود احمد يابو حميد ومتتأخرش علينا تانى
بوست عسول
احييك اتمنى تنورنى
الغيبه دى كلها سببها ان الجواز هيغلا
يا رب تكون كويس وبكل خير
والله يا..........هندس المشكله ان معدش في حد بيثق ف حد الايام ده ولو وثق ورتبو حياتهم وكل شىء متوفر وموجود ف حاجه بتيجي تفركش كل حاجه يا...............
سورى يا اخوانا ع التاخير
جد مشغول جدا
انتوا عارفين بقه المهندسين
محاسن صابر
هلا والله اخت محاسن منورانى ومنوره البلوجر
الحكايه وما فيها ان الكدب ده حاجه راسخه ومش هتتغير ياباشا ولو ع الحكومه كلنا بنحبها والحكومه من الاخر كده فله شمعه منوره !!!!!!
ربنا يجعل كلامنا خفيف عليهم
منورانى يا محاسن
ارجو التواصل
تحياتى
هندس
نون
وحياتك انتى يا نون انا عرضتها للبيع
بس لقيت الحكايه مش جايبه همها
القصد يا ستى
معلش انتى بقه عارفه مشغولياتى فى بناء الوطن وغيره من المشروعات المهمه
واوعى تصدقى الاشاعات
ازعل !
منورانى يا نون
واتمنى تنورينى كده علطول
تحياتى
هندس
wezza
او المشهوره بالباش مهندسه
اول زياره ليكى لمدونتى
لازم ولابد نعملك التكريم المناسب
ونرحب بيكى كده حبتين تلاته يا لمضه
كنت مشغول اوى
يعنى انتى مش عارفه
طب عينى ف عينك كده ؟
منورانى يا وزه
ويارب تنورى كده علطول
تحياتى
هندس
بنت مصريه
او نقول مسز انجى
شفتى انا لسه فاكر ازاى
معلش يا انجى انتى عارفه انا مشغول ازاى ووالله لما افضى هرجع تانى ببوستاتى ربنا يسهل واجى ازور مدونتك ع عينى ياباشا
انا برضه بقول كده ان العرايس لا معطبه ولا غيره
هى المساله كلها مساله نفس
اصل بينى وبينك كده ولا بلاش احسن حد يسمع ولا حاجه
العرايس دول زى العسل والمساله ع فكره مساله ماديات مش اكتر هههه
منورانى يا انجى ولا اقولك يا دوك
زى ماتحبى
وانشاء الله ازور مدونتك زى زمان كده
تحياتى ليكى
هندس
غير معروف
طبعا يا باشا انت غنى عن التعريف
والله ع رايك بتحصل ساعات حاجات ماحدش بيبقى عامل حسابها وتبقى المساله ماشيه بيس خالص ومره واحده الموضوع يتفركش
منورنى ياعم الحج
تحياتى
هندس
weza
ماقلتليش كنت مشغول حبتين تلاته ليه
اصل انا مش عارفه وعيني ف عينك اه
ويارب تنورني ع طول وميرسي على الترحيب
اخبارك ايه يا مستر ايجيبت
رمضان كريم عليك وعلى كل من تحب وعلى الملايكه اليى صورهم منوره عندك فى البلوج
ربنا يحميهم لاهلهم
صورة ظريفة كتييييير
:)
هيلغى اكتر من كدة
اديكم شايفيين الدهب بقى ازاى
وكل شيىْ فى الطالع
بس اصلا لا بعض الشباب مش جاد
وبعض البنات كمان مش جادات ..
قليل جداااااااا اللى فاهميين يعنى اية مسئولية .. ؟؟
والله يامعلم
كل شيىء بيغلى ....
الا الانسان كل مدى قيمته فى الناااااااااااااازل
الله يعوض عليا عوض الصابرين
إرسال تعليق