احلى حاجه الصحبه

السبت، 18 يوليو 2009

حياة العازب فى مصر

طبعا كلنا عارفين حياه العازب المصرى
وبالتاكيد هى حياه فوضويه مليئه بكل شىء ممكن ان تتخيله
بدا كلامه عن ال mozaz فوصفها بالسجائر (طبعا هيبدا بالسجاير هو وراه غير السجاير والن........) وقال ايه يا ستى
الست فى العشرين زى السيجاره الكليوباترا لازم تفركها كويس قبل ما تولعها
الست فى التلاتين زى السيجاره المارلبورو الاحمر سالكه وحاميه بس الكتير منها خطر على الصحه
الست فى الاربعين زى الشيشه ماتقومش معاك غير بعد تالت حجر ( وشيشتك صايصه يا معلم )
الست فى الخمسين زى السيجار بيتطفى لوحده
وديه فكرته عن الmozaz
العازب اسكندرانى لا يجيد العوم مصور محترف لا يجيد تركيب الكاميرا السكر فى التلاجه براد الشاى فى غرفه النوم
والتلفزيون مفتوح النوم الذى يقلده المهرجون والقرود الاحلام والالقاب مكتوبه على الحائط بوستر بالالوان الطبيعيه لسميه الخشاب
عايز شقه مفروشه جديده بالتليفون رصه الكتب الى جوار الاباجوره (قديمه شويه سامحونى) الحذاء فى البلكونه التلاجه عطلانه الحوض مسدود
الحنفيه بتنقط الانبوبه فضيت لمبه المطبخ اتحرقت الصابون خلص مافيش سكر تليفون البيت عطلان
احسن !
الله يكون فى عونه
فى افراح العائله
نجم فى مشاكل اصدقائه الزوجيه حكم فى التجمعات التى يكثر فيها الازواج فاكهه فى البيت مجرد علبه بيروسول فى الموبيل يبحث عن اصدقائه ايوه يا اخوانا انتوا فين بس ؟
العازب
ملك المعلبات والاطعمه المحفوظه متعه الطعام لديه مؤجله الى حين
حتى الوجبات التى يجيد طهوها تدعو للتعاطف اسكالوب بانيه سلطه بطاطس مكرونه اسباجيتى بالتونه وسلاطه فواكه بالطبع ليس هناك ماهو اسهل منها (ده لو عرف يعملها اصلا )
الشك يسيطر عليه فى كل مره يفتح فيها باب التلاجه ويمد ايده لشىء بداخلها ويشمه بحذر شديد وهو بيقول شكلها باظت
ثم يمد يده بالطبق او العلبه لصديقه خد شم كده يا برنس ... باظت صح ؟
الطعام مشكله يوميه وسؤاله الذى يستهلك وقت ومشاورات فى كل مره يطرح فيها هو هناكل ايه ؟
اصدقاؤه الاعزاء مؤمن وكوك دور وتيبستى وكنتاكى وغيره
البقال عارف طلباته
لو سمحت 10 بيضات وربع رومى قديمه ومخلل وعلبه سجاير وكمان باكو شاى العروسه وكيس سكر ممكن لو سمحت كمان كيس مسحوق غسيل على اساس انه بيغسل
الجيران كلهم يسمعونه وهو بيغسل الاطباق والاكواب ويغنى ويقول انا قلبى برج حمام هج الحمام منه ( اكيد ماكنش بياكلهم )
العازب حريقه دخان يعنى مين هيقوله بطل ؟
وكل الحاجات فى البيت تنفع انها تكون طفايه الاكواب والاطباق والصينيه والبلكونه
يدخن فى كل مكان فى البيت زى المجنون اصله قاعد لوحده
ومع اول نوبه اكتئاب يهب المار بالشورت لمواجهه القذاره المنتشره فى المكان
ودايما بيبدا بالمطبخ حيث يتخلص من كل الاطعمه او الفاكهه الفاسده الموجوده فى تلاجته ويجمع علب العصير الفارغه وزجاجات الكولا البلاستيك وقشر البيض وحبات الليمون وبواقى الخبز فى كيس كبير للقمامه
ثم يغسل الاوانى كلها ثم سطح البوتاجاز والى غرفه النوم حيث جاء موعد تغيير الملايه وكيس المخده وازاله الاتربه وصحف الاسبوع واكواب الشاى الموجوده خلف السرير
ثم ازاحه السجاده مع القليل من الكنس والمسح
ومن غرفه النوم الى الحمام حيث زجاجات الشامبو الفارغه وانبوبه معجون الاسنان التى اصبحت قوقعه حلزونيه ويملىء اكبر حله ويدلقها فى ارضيه البلكونه ويسيبها عشان تنشف لوحدها
وعندما يشعر ان بيته اصبح انضف من البيت الابيض نفسه يضع فيشه السخان وياخد الدش المحترم
ويشعل عود بخور ويجلس بكوب الشاى والسيجاره امام التلفزيون وهو يقول لنفسه والله الستات بتتعب
يالا وكل سنه وانتوا طيبين
وعام دراسى حيلو كده علينا كلنا انشاءالله
كان معكم هندز

الأربعاء، 11 فبراير 2009

الجواز حيغلا

لاشك ان الكذب قديم لان الانسان قديم والكذب ولد من رحم الصدق
فالتصديق لابد منه لجريان الحياه
فاذا سرت فى طريق واعترضتك لافته مكتوب عليها ممنوع المرور لا بد وان تصدق واذا قالولك ان الارض كرويه لابد وان تصدق واذا طلبتنى فى التليفون وقالولك مش موجود برضه اوعى تصدق
ولكن هل يصبح للحياه طعم اذا سارت صادقه كل حاجه حقيقيه ولافيش كلمه كذب واحده
تخيل كده معايا لو واحد انا لابحترمه ولا بعزه وببعتله جواب هقوله ايه فى اوله
هقوله عزيزى وفى اخر الجواب هقوله مع خالص احترامى وتقديرى
ولا هقوله فى الاول انت ياللى ماعرفكش وفى نهايته اقول انا لا احترمك لانى لم اعرفك هيكون هناك مشاكل
والحياه لايمكن ان تكون كلها جد الجد يقتل النفس والهزار يعيد اليها الحياه
ولذا اخترع البنى آدم عيدا للكذب عمره نصف يوم يبدا من نصف ليله اول ابريل الى منتصف نهاره يجوز للناس فيها استغفال بعضهم دون عتاب
تعالى كده وخد هديه من صديق تيجى تفتحها تفرقع فى وشك وهديه من صديق اخر مش بتنفتح اساسا
يتصل بى فجاه وهو فى قمه الانفعال ويقوللى الحقنى ياعم انا مستنيك فى اخر شارع الهرم عند كباريه الفروكريتو وتعالى بسرعه انا فى ورطه كبيره اروحله على مله وشى بسرعه ومالقيش اى حد
او انك تلاقى شخص تانى تعرض لنفس المقلب وان جريده امريكيه نشرت انه فى حديقه كذا فى الساعه العاشره صباحا سيفتح معرض به خمسه الاف حمار فى مهرجان الحمير الدولى الاول
وذهب اللى صدق الخبر الى الحديقه وراوا الاف الحمير وطبعا المقصود بيهم اللى صدقوا الخبر

وحدث انه فى اول ابريل بعث احدهم مع مساعده بخطاب الى صديق فى اخر الدنيا مكتوب فيه النهارده اول ابريل
والمساعد بتاعه مغفل وقارفنى طول السنه وكان نفسى اعمل فيه حاجه فارسلته اليك حتى اقطع نفسه فوضع الصديق الخطاب امامه ونظر الى المسساعد الذى يتصبب عرقا
وقال له يبدو ان صديقى اخطا الجواب ده مش ليا الجواب ده لازم يكون النهارده عند مستر جون فى اخر واشنطن تخطف رجلك لحد هناك وتجيلى تانى

ومساعد مسكين اخر ارسله المدير الى مكتبه فى اخر الدنيا برضه ليبحث له عن كتاب اسمه لبن اليمام اصله بيشفى من العته بعيد عن السامعين والمقرئين مش مهم

المهم بعد ساعات من البحث والتنقيب نظر له صاحب المكتبه بضيق وقال له هو اليمام عنده لبن

ولكن اشمعنى ابريل بالزات

بيقولوا ان النبى نوح عليه السلام بعد ان صنع سفينته ارسل حمامه للبحث عن مكان امين يمكن ان ترسو فيه السفينه

فلما عادت الحمامه وانباته بان الطوفان ورائها سخرت منها بقيه الحيوانات والطيور التى كانت بالسفينه واتهمتها بانها كذبه ابريل

ولم يعد الكذب الان هو ان تقول مالم يحدث او تخالف الحقيقه وانما صار بعض الناس يتنفس الكذب ويعرق كذب

زى ما يقولك ده انا شوفتها قاعده معاه جميله بلاشك وحينما سالنى عن رايى فيها قلت له مش عارف حاسس انها كدابه

اعترض وسالنى كدبت فى ايه

قلتله لم تكدب فى شىء ولكن ردود افعالها كدابه

عينها كدابه وحركه ايديها كدابه وشعرها كمان كداب وانا مش قادر اصدقه

واسوا شىء حينما تحاول اى واحده منهم تبان صادقه وطبيعيه كده

ياساتر وياباى على البراءه المفتعله والبصمه المعموله كل شىء كده تحس انه مصنوع

ولكنها فى النهايه بتلاقى الاهبل اللى يصدقها ربما لانه هو كمان اكذب منها

وعلى راى شلاطه بتاع البطاطا اجرى يابن آدم جرى الوحوش يا تلحق اليكروباص يا متلحقوش
واحدث كذبه ابريليه سمعتها ومش عارف ان كانت كدبه ولا اشتغاله

القصد شائعه كبيره منتشره ان الزواج اعتبارا من الشهر القادم حيغلا يعنى ايه الكلام ده

قال لى العامل البسيط ان فى احباط ومراره ح يدفعوا الراجل ثلاثه الاف جنيه تامين

هو الشباب عارف يتجوز يا بيه لما يدفع التامين وعشان كده كله بيتجوز دلوقتى قبل القانون ما ينزل

لما سمعت الكلام ده ببص لقيت المخطوبين اللى لسه ماجهزوش بداوا يتجوزوا وبعد كده يجهزوا نفسهم براحتهم

دول ثلاثه الاف جنيه يابيه يعنى يجيبوا ويجيبوا ويجيبوا كمان بس ايه انا مش عارف اللى يعرف يبقى يقوللى

وشوف بقه ايه اللى حصل فى دمياط بلد الكرم

الجواز يا جماعه بقى بالطوابير كله عاوز يلحق نفسه ولعلمك المآذين بيشتغلوا برضه اصل ده الموسم بتاعهم

وفى كفر الزيات البلد كلها سهرانه بتتجوز على انغام ما تجوزينى يا ماما واللى شابك خلص الموضوع بدرى بدرى

واللى قارى فاتحه قوام قوام جاب الماذون

قلتله ياسيدى مايمكن تكون كذبه ابريل

قاللى وانا اعرف منين تقوللى كذبه ابريل والبسها انا فى مايو

وخرجت من عنده وانا اضرب كف بكف وعلى راى المثل قاللى الوداع قلتله قشطه !

وبيقولوا السكر حيغلا وامى تحول فى سكر وتشيل ويقولوا اللحمه حتغلا والكل الله ينور بيخزن

ولكن الجواز حيغلا ساعتها حتخزن ايه بس مافيش غير العروسه وتيجى تتجوزها تلاقيها بقت معطبه واللى يفرسك انك تلاقى الموديل الجديد بتاعها نزل فى السوق

مافيش غير ان الواحد يشد حيله كده ويتجوز اربعه فى الرخص ويخليهم هينفعوا

مافيش حاجه بتخسر فى زمانا ده وعلى راى المثل يا حلاوتك يا عنبه وانتى قاعده ع الكنبه

ولكن كيف صدق الناس الكذبه ده اذا كانت كذبه

الا اذا كان هناك نوع من عدم الثقه بينهم وبين المسئولين واحساسهم العبثى الغريب بان اى شىء يمكن ان يحدث

فعلها الحاكم بامر الله فى ايام الدوله الفاطميه حيث اصدر امره بمنع اكل الملوخيه

وصارت الملوخيه مثل المخدرات التى يعاقب عليها القانون

وضبط العسس ( العساكر يعنى ايامها )

عائله تجلس امام حله ملوخيه بالتقليه ونازلين لهط فيها

والحمد لله انها كانت ملوخيه خضرا

فالناشفه كانت عقوبتها اشد بكتير

معلش يا اخوانا على التاخير ده وطبعا اخوانا عايده على الجحافل العظيمه التى تتابع المدونه

الا وهى مدونه هندس

كنت بس مشغول حبتين تلاته كده بس ربنا يسهل ونرجع تانى زى الاول

تحياتى للجميع

بيبـــــــــو

الاثنين، 20 أكتوبر 2008

عجبى

بيقولوا المراه فى طريقها الى حكم العالم !!!!
اللهم احفظنا يارب
حتى فى ولايه تكساس المشهوره برجالتها الشداد او التفاجايز قصقصت المراه شوارب الرجال واستولت على الحكم فتولت ان ريتشاردز وزاره الخزانه فى الولايه واصبحت ليلى كوكريل رئيسه لبلديه سان انطونيو وقبلها راست انيت شتراوس بلديه هيوستن
وواضح ان المراه هتستولى على قياده العالم ربنا يستر
فهى فى بريطانيا والنرويج والفلبين وباكستان وغيره رئيسه دوله ورئيسه وزراء
وكانت هناك قبل ذلك انديرا غاندى وفبجايا لا كشيمى وبندرانيكا وكاينج تسنج ومن المتوقع ان تضاف الى قائمه حاكمات الدول تاكاكو دوى زعيمه الحزب الاشتراكى اليابانى
ولا يمكن ان يكون وصول المراه الى قياده الدول على هذه الصوره وليد مصادفه
بل هو بالتاكيد نتائج مخطط نسائى محكم بدا بالثوره على الرجل فى اوروبا واميركا ثم استئناس الرجل وتحويله الى خنفس اليف يضع الحلق فى اذنه ليعلن عن بدء عصر الرجال الاغوات
وفى السويد الان حركه نسائيه تطالب بتبادل المواقع فيلزم الرجل البيت يطبخ ويغسل ويدادى فى العيال ويحضر الرضعه
وفى الوقت ده تتفرغ المراه للعمل وشغل المناصب العليا دون الرجل
وسوف تصل المراه السويديه الى اهدافها لان الرجل هناك مؤدب ومهذب ومطيع واليف جدا
وهى خطوه سوف تعقبها خطوات جديده الى ان تستولى المراه على العالم ليصبح حكمها عنصريا يقوم على اضطهاد الرجل تشفيا وانتقاما وسوف تظهر الجماعات النسائيه المتطرفه لتنادى بوجوب التخلص من الرجل بالمذابح الجماعيه حتى تسلم البشريه من شروره
فمنذ الازل وهو يشعل الحروب ليحرق قلوب الامهات ولابد ان امبراطوريه النساء سوف تسخر التقدم العلمى لنقل الحمل من بطن المراه الى بطن الرجل وسوف يموت فى هذه التجارب العلميه مئات الالوف من الرجال ذوى البطون المنفوخه
وسوف تنشط لجان حقوق الانسان تناشد حاكمات العالم بوضع حد لاباده الرجال
غير ان الرجال من جانب اخر سوف تتكون بينهم جماعات تطالب بالمساواه مع الجنس الحاكم
وسوف تتضاعف المنظمات السريه التى تقود حرب تحرير الرجل عن طريق العنف
ومن الاخبار التى سيطالعها القارىء فى ذلك الزمن القادم
اكتشفت السلطات المختصه فى كشاكاوانيا عبوه ناسفه فى قلم روج السيده رئيسه مجلس الوزراء الكاشاكاوانى
وتم ابطال مفعولها قبل لحظات من تناول رئيسه الوزراء لقلم الروج لتطلى شفتيها والمعروف ان السيده رئيسه وزراء ليمونيا راحت ضحيه حادث مماثل
اذ تم حشو باروكاتها بماده ناسفه
وقد اعلنت منظمه الموت للنسوان مسئوليتها عن الحادث

السبت، 4 أكتوبر 2008

مين فين ايه ليه يا ايمى تعملى كده ليه !!!




ولا كان على البال ولا على الخاطر جانى تاج من اخت عزيزه عليا
الا وهى ابله ايمى واسمحيلى انى اقولك يا ابله
نبدا منين انا مش عارف اقولك ايه بس يا ايمى
يعنى لازم تبعتى البتنجان ده
ده انتى كده عاوزه تكدرينى يا ساتر ههههههههههههههههه
مش عارف انا احسبن عليكى ولا اعمل ايه انا دلوقتى
يالا القصد اهه واجب كلفتنى بيه ابله ايمى
يارب اطلع شاطر واعرف احله
لما ادخل فى الموضوع عشان ماطولش كتير
السؤال الاول علل يعنى افصل
هل محلات الجزاره بتبيع لحمه ههههههههههههه
خلاص خلاص احسن انضرب
لما ادخل على التاج احسن تقول عليا مشاغب وانا سيرتى عناب هههههههههههه
أذكر ستة أسرار قد لا يكتشفها من يقابلك لأول مره!!!؟
اولا يا اخوانا صعب اوى حد يعرف عنى حاجه اول ما يقابلنى اول مره
لانى بتعامل معاه على اساس انى اعرفه من زما ن
وديه بتعملى مشكله مع الناس لان اللى اعرفه واللى ما اعرفوش بهزر معاه هزار تقيل اوى
وفيهم كتير مش بيتقبله وبيعتبره نوع من الاستخفاف او انى مستقل بيه وانى بتريق عليه
بس انا مش كده خالص لانى من عادتى احب الناس جدا وبحب اتعرف على اى حد مهما كان
لكن الحمد لله لما يقعد معايا كتير بيعرفنى اوى والحمد لله بيحبنى جدا
انا من النوع الاجتماعى احب الضحك والهزار
مش بحب الحزن وماحبش الناس النكديين
احب اتريق على اى حاجه ولكن فى سبيل الهزار
ماحدش يعرف ياخد معايا لاحق ولا باطل لانى ممكن اكسبه فى الكلام
ناس كتير بيفكرونى مغرور
بس جد انا مش كده ممكن عشان اسلوبى فى الهزار
ماعنديش حاجه اسمها جد الا فى اوقات قليله جدا لما اكون متنرفز وصعب جدا انى اتنرفز
وكل الكلام ده صعب جدا ان حد يعرفه اول ما يشوفنى
اللى بعده
سبع حاجات نفسك تعملهم!!!ا
ولا نفسى اعمل تصميم لاحد عمله ولاحد يقدر يعمله بعدى
نفسى اشارك فى الفريق الهندسى الذى يقوم بالتوسع فى الحرم المكى
اتمنى اخلص الكليه بتقدير جامد كده امتياز مثلا يبقى موز موز موز جيد جدا اشطه جيد ما يضرش مقبول وماله ضعيف البس الطرحه واقعد فى بيتنا هههههههههههه
انى اخطب اول ماخلص واتجوز علطول البنت اللى بحبها
انى اروح الامارات وخاصه دبى وربنا يسهل
انى احج اكتر من مره لبيت الله الحرام
اشترى سياره لامبورجينى هو حلم طبعا بس برضه ربنا يسهل هههههههههههههه
غيره
سبع حاجات معرفتش تعملهم!!!ا
انى ادخل هندسه بترول
احفظ القران
اكمل لعب كوره منها لله الثانويه العامه
انى اصحى بدرى اصل نموسيتى كحلى ههههههههه
ابطل حب الكوره وطبعا الريد ديفلز
ماعرفتش احب الزمالك مع ان عيلتى من كبيرها لصغيرها زملكاوى ايون عدو يعنى ههههههههههه
مش عارف اتخلص من العاده المصريه وهى العشوائيه مابلتزمش بحاجه حالى كحال معظم المصريين
وضيف على كده انى مش عارف ابقى جد ربنا يستر ههههه
اللى بعده
سبع حاجات دايما بتقولهم !!!؟
هههههههههههههه
واخد بالك
شوف شوف
موز موز موز
ايه يا عم البتنجان ده
لخص / انجز
ايون
سلامووووووز وبايلاموووووووووز
اخر حاجه
غيره
سبع مشكلات فى حياتك ممكن تحلهم بالفلوس!!!
مش اى حاجه تتحل بالفلوس
ولكن ممكن اساعد الفقراء
ابنى مساكن للشباب
اجيب فرص للعمل
اسافر اعيش حياتى
ولكن طبعا المهم هو طاعه الله ورضا الوالدين وحب الناس ودول مش بالفلوس
اللى بعده
سبع أماكن بتحبها!!!
اولا المسجد بحس انى فى ملك تانى خالص بالزات لو المقرىء كان صوته حلو
ثانيا مدينتى المفضله وهى القاهره
ثالثا طبعا هى القهوه
الشارع
احب اروح كل الكليات
الجلوس امام النت فى الاوضه
اخرج مع اصحابى فى اى مكان
غيره
سبع أشخاص بحبهم غير بابا وماما واخواتى!!!
دول كتير اوى ولكن المقربين جدا منى اكيد هم اصحابى
القرشى فلانتينو
عبده برايز
الفنان هشام
يحيى بيكاسو او ابليس
عبس المخبر
الكومى دياب
رمزى وحسن
والمدونين
وغيره كتير وانا بعتذر لو كنت ما جبتش سيره حد بجد كلهم حبايبى
اللى وراه
سبع حاجات بتحبهم قوى!!!
التصميم المعمارى ويا سلام بقه وانا ماسك القلم ومعاه الورقه وعمال برسم حاجه موز موز موز
الخروج مع اصحابى بالدنيا ومافيها
القاعده على القهوه ويا سلام بقه على الحجرين لما يكونوا متكلفين هههههههههههههههههههههههههههه
النت
بحب المحشى وياا سلام لو كان بتنجان ولا كرنب ههههههههههههه
الكوره
استمتع بابداعتكم وكتابتكم فى مدونتاكم
غيره
سبع مدونات بتحب تقرالهم!!!
هو انا من عادتى كسلان
وما بحبش اقرا
بس طبعا اجى عند المدونات وما اقدرش ما اقراش
ولكن هتقوللى مين احسن سبعه هقولك
.......................................
كل اللى بيزورونى وبزورهم
ايون االلى الود موجود ما بيننا ههههههه
اللى بعده
تمرر الواجب/التاج لمين؟
اقول ولا بلاش بلاش احسن حد يدعى عليا
وانا فى قفا دعوه ههههههههههه
كل اللى يدخللى وماكنش عنده التاج ده ياخده
واللى مش هيعمل الواجب هكدره
بالزات المدعوه ايمى قصدى ابله ايمى ههههههههههههه
ارجو ان اكون قد اتعسناكم
وخلصنا الواجب على خير
وياريت الدرجه تبقى فى السر
مش عاوزين فضايح
ماشى يا ابله ايمى ههههههههه
يالا تحياتى بيبـــــــــــــــــــــــــو

الأربعاء، 24 سبتمبر 2008

هى ديه مصر يا عبله




فعلا يا اخوانا حاجه تدعو للفجر ان المصرى القديم يصل الى درجه كبيره جدا من العلم التى اهلته انه يحفظ الطعام الاف السنين وذلك باكتشاف قوالب الزبده الفرعونيه ومن قبلها الجبنه البيضه ( ايون حلايب وكمان شلاتين وكله يمشى ) وبها بكتيريا صالحه للتخمير

وهذا يعد اعجاز علمى بكل المقاييس كان لازم ولابد ان تهتم به اجهزه الاعلام اهتماما خاصا لتعرف الدنيا من نحن ومن نكون ؟؟؟؟؟

احنا ولاد الناس الطيبين خوفو وتحتمس واحمس واخناتون ورمسيس وغيره كتير من الاسره المالكه

ولكن فى ناس بتقول علينا احفاد متخلفين وان سبب تخلفنا هو تفاخرنا المستمر والمتجدد بالاجداد والاهرامات والكرنك وقوالب الزبده ههههههه

سيبوكوا ( نفضضوا ) من العالم دول يا اخوانا اكيد هم ناس حاقدين !!!

هناك ايضا من يقول اننا اللى هم الاحفاد بنلبس ثيابا باليه عليها اثر العز القديم ونقدم انفسنا الى المجتمع الدولى على اننا من اكبر عيله فى التاريخ

وبرضه صدرلهم الطارشه حتى لو كان ردهم علينا .... طظ

فنحن من عالم حديث لا يعترف باولاد الزوات من العائلات العريقه كما انه عالم يستنكر ان يعيش الانسان على سمعه القديم

ولكن اطمئن يا باشا ده احنا احفاد الفراعنه ولك ان تفخر كامل الفخر بانك حفيد الفراعنه (ايون فرعون بس لسه شمرط هههههههههه)

ونحن لا نقل عظمه عن الاجداد فاذا هم كانوا استطاعوا حفظ قوالب الزبده من الاف السنين فانا مش محتاج لذلك الان

لان ببساطه عندى ديب فريزر يحفظلى قوالب الزبده وهو فى متناول كل الحاجزين بالدور او بالوساطه ؟

واذا كان الوزير امحوتب رائد الفن المعمارى ( اه زيى كده بس انا هكون فى العصر الحديث اللى احنا عايشينه )

ومصمم هرم سقاره اعتبرته الحضاره الاغريقيه

فوق البشر لعبقريته وعبدوه بالفعل الها للطب والسحر والفلك

فنحن الاحفاد ايضا عندنا الوزير العبقرى الذى تعبده حضاره بنى همبكه وتقيم له الطقوس وتحرق له البخور

واذا عايرك احد بان نسبه الاميه بلغت 70% بين احفاد الفراعنه وهم اول من اخترعوا الكتابه فى التاريخ

فرد قائلا باننا ايضا ابتدعنا كتابه تصويريه كالهيروغليفيه

فالهلال معناه الحزب الوطنى

والنخله معنناها الوفد

والنجمه معناها حزب العمل

والمفتاح معناه حزب الاحرار

اما البتنجان فمعناه الكوسه

واذا قيل لك ان الاجداد قد برعوا فى علم التحنيط الذى لا يزال سرا كيميائيا مستغلقا

فتفاخر عليهم لاننا نجحنا فى صنع المومياوات او الانسان المحنط ( ادخل كده اى مصلحه حكوميه وانظر الى الجالسين على المكاتب )

واذا كان الفراعنه روادا فى اكتشاف الامراض وعلاجها

فان طب الاحفاد لا يزال سابقا ايضا الى اكتشافات جديده

اخرها ذلك المرض الذى يصيب الانسان بالاسهال مع العطش الشديد والمغص وصعوبه البلع واصفرار الوجه وزيغ العينين

وذلك عقب تناول زيت التموين

ولا تجعلهم يشككونك فى نسبك


بالتاكيد نحن ابناء قدماء المصريين فمن المؤكد انهم لم يعثروا علينا على باب جامع يعنى

نحن ولاد الناس ونحن من اعرق الاسر البشريه اولاد الزوات وعن وجه الشبه بيننا وبين ابائنا الاوائل فهو قوى جدا

امشى كده فى القريه او المدينه وسوف تجد كل الوجوه طبق الاصل من سنفرو ونفناو ونخت وسى تى وتى تى ولا تبالغ فى الاختلافات

الاختلاف الوحيد بيننا وبينهم هو مساله الوقت فنحن مثلا نرى ان التانى واجب وهم كانوا فى عجله من امرهم وكانوا بيحرصوا على الوقت

بطريقه غريبه فلم يعرفوا المسلسلات ولا اغانى عدويه ولا الشاب المتتامر وحتى زيهم الفرعونى الشهير الذى يكشف الجزء العلوى من الجسم روعى فيه مع بساطته وملائمته للجو واختصار فى اللبس والخلع

بل هو اسرع زى للبس اذ قورن بما نرتديه

نحن فى ريفنا البنش والصديرى واللباس ابو دكه

فالبنش فيه على الاقل عشره ازرار قطن والصديرى خمسه عشر زرار ويتطلب تزرير وفك الاتنين خمس دقايق فى المتوسط يوميا صباحا ومساء اى 30 ساعه فى السنه اى يحتاج الانسان كل خمس سنوات الى سته ايام تزرير وفك الازرار ( غير العطلات الرسميه والاجازات )

وكان المصرى القديم يعرف ان القفا المصرى العارى يسبب المشاكل اذا امتدت الي هذا القفا يد غريبه الامر الذى سوف يضيع الوقت فى الخناق ( وزى ما غناله محمود عبد العزيز اه يا قفا اه يا قفا اه يا قفا ) فكان غطاء الراس الفرعونى ذو الخطوط العريضه يغطى القفا

بينما البنش بلا ياقه كما ان اللاسه لا تغطى القفا الامر الذى جعل اقفيتنا هى ابرز ما يظهر منا بوضوح شديد

وهو امر غير مستحب بل ان اهتمام المصرى بالوقت بلغ مداه

فاصبح اول اختراع فى التاريخ لقياس الزمن

المزاول او الساعه الشمسيه ويقول احد العامه ان المصرى القديم قدم خدمه للتاريخ لا تنسى بابتداعه اول وادق تقويم سنوى فى العالم اخذه عن الرومان ثم صار الامر لكل تقويم وبفضل اختراعات ابائنا اصبح فى يدينا ساعه نعرف بيها وقت التوقيع للانصراف عن العمل

وعلى كل حائط نتيجه نعرف بيها موعد القبض اول الشهر وموعد الاجازات والعطلات

كذلك كان المصرى القديم يحدد مكان النوم فى الفراش فقط ولم يكن يعرف ان لجسمه عليه حق وان الانسان يمكن ان يرتاح وينام فى اى مكان

وان يرفع شعار مطرح ما ييجى فى عينى النوم انام وانا مرتاح البال

وما كان معيبا بالامس صار مباحا اليوم وهو النوم فى العسل قصدى فى الممنوع والوقوف فى الممنوع والسير فى الممنوع

واذا كنا لا نعمل فلعل ذلك يقنعك باننا فعلا اولاد زوات واولاد الزوات لا يعملون

فقد شقى اباؤنا من اجل راحتنا وتركوا لنا ريعا سنويا من الاهرامات والكرنك وتوت عنخ امون



قبل ما اختم كنت احب اقدم لكم الفنان هـــــــــــشام الشهير بسلس المصرى

احد المصريين الذين بداوا يتخزوا مسار الغناء فى هذه البلد الجميله

وقد احتل المركز الاول فى مسابقه هيل ميكرز

التى تقدمها سنويا على موقعها الرسمى

وله عده اغانى وانشاء الله نازل باغانى جديده

وهتسمعوا عنه قريبا جدا باذن الله ولو اى حد عاوز يسمع صوته

هيلاقي اغانى له فى التراك ليست

وبينى وبينكم كده هو انشاء الله هيكون اجمد من الشاب المتتامر

كفايه ان ماعندوش شعر صدر عشان يبينه هههههههههههههههههههه


معلش على الاطاله

ولكن هى دى مصر يا عبله

الثلاثاء، 16 سبتمبر 2008

القديم ....... و........ الجديد ... !

دائما وابدا تتعاقب الاجيال وتختلف دائما طريقه التفكير
وحسب الدراسات العلميه التى اكدت ان الاجيال الجديده اكثر نضجا واكثر قدره على التفكير
يعنى مفيش حد يعرف يغلبهم فى الكلام .. ايون عيال غلابويه ولمضين
والمهم انهم بيسموا كل ده بال روشنه
يعنى وضعوا شويه اسئله كده من اللى قلبك يحبها علشان يشوفوا العيال هتعمل ايه
المهم كانت الاسئله لتلاميذ صغار فساله وقاله
ماهو مذكر دنيا ؟ ورد التلميذ ردا ذكيا اثبت فيه ان اسلوب تفكير الجيل الجديد يفوق بمراحل واضعى الاسئله
فقال بايجاز
ليس لها زوج نعرف اسمه
فالواد الصغير سال واضع السؤال وقاله انا لقيت والدى بيدندن فى اغانى عبد الوهاب وبيقول فى اغنيه الجندول
قلت والنشوه تسرى فى لسانى هاجت الذكرى فاين الهرمان
ولان الاهرامات عندنا تلاته وهم خوفو وخفرع ومنقرع .. فقاله طيب خوفو وخفرع موجودين
طب فين بقه منقرع ؟
فرد عليه وقاله يابنى انا قريت القصيده كتير ووصلت انه كان بيصور نفسه عاشقا وكان يتذكر هرما واحد وهو خوفو اللى كان يجلس تحت سفحه وهو يابنى كان فرحان اوى وكان شرب حاجه صفرا بتجعل الانسان ينظر الى الشىء الواحد فيراه اتنين وهكذا نظر الى خوفو من خلال خياله فوجده اتنين وعندئذ تسائل اين الهرمان فلو قبلت هذا التفسير خير وبركه ولو ماقبلتوش فانا ماعنديش تفسير غيره خصوصا ان هرم منقرع ماتسرقش ضمن الاثار المنهوبه كل يوم
وياريت لو اى حد منكم عنده تفسير فليتفضل به الى ساحه المعركه
وفى الواقع ان الصغار لهم لمحات تدل باستمرار على ان الاجيال الجديده اكثر تفتحا وتطورا مثلما حدث فى هذا السؤال عندما طرحوه على الصغار وجاء فيه
امامك قطعه لحم قسمها الى نصفين ثم نصف النصفين ثم نصف نصف النصفين ... الى اخره
وكانت الاجابه
نصف - ربع - 1/16 وظل يكتب فى القسمه ثم كتب والان لايمكن قسمه قطعه اللحم اصغر من ذلك بعد ان اصبحت هبورجر !
وردا على سؤال اذكر شهرا به 28 يوم قالوا كل الشهور بها 28 يوم
وعندما سئلوا ماذا قال يوليوس قيصر عندما طعنه بروتس فجاء الرد
قال متوجعا اى اى
ولما قال اذكر خمسه اشياء تحتوى على اللبن كان الرد
الزبد والجبن والايس كريم وبقرتان !
وردا على مساله حسابيه عن ام لديها اربع حبات بطاطس وخمسه اطفال وتريد ان توزعها بالتساوى على الاطفال الخمسه فقالوا
تطبخها مهروسه هههههههههههههه
وعندما قال عن نتائج اكتشاف القطب الشمالى فقالوا ان دروس الجغرافيا اصبحت اكثر سخفا
ولما قالوا اذكر اختراعا لم يكن موجودا قبل 15 سنه كان الرد
انـــــــــــا
وفى سؤال ماذا تفعل لو كنت مليونيرا
ترك التلميذ ورقه الاجابه بيضاء وقال هذا ما افعله
وعملوا امتحان فى الاخلاقيات
فقال اعطاك رجل مائه دولار لكى تحفظها له ثم مات ماذا تفعل
قال اصلى من اجل ان اعثر على رجل اخر مثله
وجاء سؤال اكمل لويس الرابع عشر كان مسئولا عن ...........
فكان الرد كان مسئولا عن لويس الخامس عشر
وجاء فى احد الاسئله ادخل كلمه يحلل فى جمله مفيده فكانت الكلمه كبيره على العيال
فقال احدهم طلب منا المعلم ان نبحث عن كلمه نحلل فى القاموس

وزمان كان الناس ما يبطلوش النق والحسد فكانوا دائما يتسائلوا لماذا تتقاضى الراقصه فى ليله واحده ما يتقاضاه مفكر فى سنوات ؟
وطبعا ظل هذا السؤال عالقا الى ان جاء واد من الشباب الروشه وعرف يرد عليهم وقال
اذا اتينا الى الراقصه وجدناها تؤدى مهمتها بالساقين والقدمين والكتفين والصدر والوسط والارداف والرقبه ولا بد من حركه الحاجبين واحد طالع والتانى نازل وحركه الشفتين ضروريه لزوم الدلال وغمزه العينين لزوم الاغراء حتى الشعر المنسدل على الكتفين يؤدى دوره ع الخدود يهفهف ويرجع يطير يعنى كل اعضاء الجسم تؤدى الرقصه الامر الذى ينفرد به الرقص الشرقى عن اى مهنه اخرى ولهذا استحق الاجر العظيم لانه يتطلب جهدا من اعضاء الجسم جميعا لا يستطيع ان يؤديه اعظم اعلام الفلاسفه والفكر
فقد ثبت ان مفكرا عظيما كارسطو كتب كتابه الكون والفساد وهو يستعمل ذهنه فقط ولذلك استحق اجر تفكيره الذهنى فقط
ولم يثبت ان نظريه الدراما وهو بيهز وسطه
ولم يقم دليل على انه كتب الاورغافون على واحده ونص
وما استحق اجرا عظيما من لم يتقصع ويهز الصدر والارداف
ومن يجد تفسير اخر فليدلى به
معلش بقه طولت عليكم


الأحد، 14 سبتمبر 2008

والله وعملوها الرجاله على نفسهم

كنت امنى نفسى ان ارى الفريق الابيض الشهير بنادى الزمالك او القلعه البيضاء كما يحب بعض الزملكويه ان يطلقوا عليه وان اراه يفوز ويرد الهزائم المتتاليه والمتلاحقه للنادى الاهلى لكن مثلما قلنا من قبل عشم ابليس فى الجنه
ولكن ما احزننى بالفعل هو الحاله التى وصل اليها الجمهور الزملكاوى او الابيض
حيث انهم خرجوا بعد المباراه والابتسامات لا تفارق اوجههم ( صحيح البعيد ما عندوش دم ) حيث انهم فرحوا فرحه الاهبل بالتعادل
مع العلم انهم كانوا فى امس الحاجه الى الفوز واقتناص الثلاث نقاط لكى يحافظ لهم على كامل فرصهم فى الصعود الى الدور التالى
ولكن مع بدايه احداث اللقاء شاهدت موقف غريب جدا انى حسيت بان الزمالك داخل الماتش وهو مهىء تماما للهزيمه حيث لم يمضى عشر دقائق نظرت بعيناى ووجدت الكره ( بتزرغت ) داخل الشباك ايه يا اخوانا ايه حصل .. الاهلى جاب جون وطبعا كما يفعل الزملكاوى فقد الامل تماما ان فريقه يقدر يعوض واخدذ يدعى ربنا ان يخرج باقل الهزائم ( يعنى تلاته اربعه )
ولكن يا لرحمه القدر الذى لعب دورا كبيرا جدا فى تعادل هذا النادى حيث استطاع لاعب نادى الزمالك فى احراز هدف التعادل والشوط الاول يلفظ انفاسه الاخيره
ويبد الشوط الثانى وجميع الاهلويه يتوقعون رؤيه الاعصار الاحمر الذى يلملم من يقف امامه ولم يمضى عشر دقائق الا ونظرنا ووجدنا الكره داخل مرمى النادى الاهلى
وفى هذا التوقيت وضعت يدى على قلبى خوفا من صحوه لاعبى النادى الاهلى الذى كان خارج نطاق الخدمه ( اظاهر ان الشبكه كانت ضعيفه )
ولكن لم يخب النادى الاهلى من امال جماهيره واستطاع بفضل نجومه ان يتعادلوا مع هذا الفريق المسمى بالزمالك
تعالوا نتكلم عامى شويه ااصلى مش بحب الكلام المزوق ده
قبل الماتش يا اخوانا لقيت كل الزملكاويه الخوف هيموتهم ومرعوبين بس لازم الكبرياء يلعب دوره
لقيت كل واحد بيضرب رقم انهم هيكسبوا الاهلى واحنا محروق دمنا من الكلام بس واثقين من نجومنا
واول ما بدا الماتش وبدا ببشرى اسعدتنى شخصيا وهى اصابه نجم الدفاع الهانى ابن سعيد قلت بركه يا اخوانا بدايتها عنب
شويه والماتش بدا واول ما بدا كام هجمه عنتريه كده من الغانم والعبدالله ولكن طبعا بلا تاثير على الامير
وبعديها علطول لقيت الكوره بتزرغت فى عبد الواحد اللى جابوه من الدار للنار اصل بعيد عنكم عبد المنصف بقى بينحس الفرقه
فبيوقفوا عبد الواحد فى القمم المهم الواد فلافيو عملها وجابها فى الشبكه بصيت ولقيت اخوانا الزملكويه نزل عليهم سهملله
وخلاص بداوا يستعيدوا زكريات الماضى والهزائم المتكرره واللى خلاص اتاكدوا انها هتحصلهم وبدا الاهلى يمسك وسط الملعب تمام التمام
ومافيش اى بروبليم خالص واللعب بدا يبقى ممل لحد ما جيمى فض الاشتباك وجاب جون للزمالك بس جون ايه جامد مووووووووووز
لان الكوره جات للاسامه اللى قطع الشورت لوائل وكلمه قطع الشورت يعنى رقصه ونيمه على الارض وحطها لجيمى اللى خد الشادى فى غرزه كده بترقيصه على الطريقه العالميه وفى الجون علطول
بصيت جمبى يا جماعه لقيت فعلا الزملكويه هيموتوا من الفرحه مش مصدقين انهم هيطلعوا فى الشوط الاول متعادلين
المهم فى الشوط التانى كنت فاكر ان الاهلى هيصورج ( هيبهدل ) الزمالك ولكن حصل العكس لقيت العيال بتوع الزمالك نازلين بروح
ووالله فرحتلهم من قلبى وقلت اخيرا العيال حسوا انهم بينتموا لنادى وخلاص فاقوا وهيلعبوا كوره
المهم اخوانا جابوا جون بقياده الاجوجو وهو جون غريب كده عامل زى بتاع البلاى ستيشن يعنى ما يدخلش فى حارس ممتاز
بس هنعمل ايه ما عندنش غيره الامير وهو لاحول له ولا قوه
بعديها الاهلى انتفض وافتكر ان هو بيلعب مع نادى بلغه الكوره كده متمرمط منه فى اخر خمس سنوات
فعاد ليبحث عن كبريائه امام هذا النادى المهلهل وبالفعل الزمالك غلط والاهلى استغل الغلطه وجاب جون بوصفه بانه مزيكا من المعلم ابو تريكه
لانه جابه بعينيه بص لعبد الواحد فى زاويه وحطهاله فى التانيه جون مزيكا بجد
وبعد كده ماتش فى قمه الملل
ولكن لازم اهنىء الزمالك فعلا كنتم رجاله وتستحقوا التعادل ولولا ان اللى بيدربكم ده مدرب تعبان كنتم فزتم بالماتش
بس يالا خيرها فى غيرها مع انى اشك ان الاهلى هيلعب بالتراخى ده مره تانيه
طبعا بكره كلنا هنسمع كلام من الزملكويه والاهلويه كتير
ان الاهلى ساب الماتش عشان الزمالك يصعد وان الزمالك ليه ضربه جزاء وان الحكم ده ابوه اهلاو منذ ان كان رضيعا ووالدته من مشجعى الدراويش فكان محايد الراجل جه يظلم هنا ظلم هنا
ماعلينا المهم خرجنا حبايب وماحدش زعل
بس كلمه للزمالكويه
انتم يا اخوانا وصلتم لمرحله صعبه اوى جه بيكم الزمن انكم تتمنوا التعادل مع فريق انتم المفروض كنتم بتكسبوه وبكل ثقه
دلوقتى التعادل معاه يعنى الفوز ليه النظره ديه
اتمنة ان يعود الجمهور الزملكاوى الى حظيره تشجيع فريقه مره اخرى وان يثق كل الثقه ان فريقه مهما عمل
مش هيكسب الاهلى ليه ؟؟؟؟؟؟؟؟؟
عشان انتم وش فقر والفقرى هيفضل طول عمره فقرى
يعنى والاهلى نايم خالص مش عارفين تكسبوه يبقى هتكسبوه امتى لما يصحى
كانت فرصتكم وانتم فرطوا فيها
ربنا معاكم يا زمالكويه
كان معكم بيبـــــــو الاهلاوى
وبدون تعصب