عجبى

بيقولوا المراه فى طريقها الى حكم العالم !!!!
اللهم احفظنا يارب
حتى فى ولايه تكساس المشهوره برجالتها الشداد او التفاجايز قصقصت المراه شوارب الرجال واستولت على الحكم فتولت ان ريتشاردز وزاره الخزانه فى الولايه واصبحت ليلى كوكريل رئيسه لبلديه سان انطونيو وقبلها راست انيت شتراوس بلديه هيوستن
وواضح ان المراه هتستولى على قياده العالم ربنا يستر
فهى فى بريطانيا والنرويج والفلبين وباكستان وغيره رئيسه دوله ورئيسه وزراء
وكانت هناك قبل ذلك انديرا غاندى وفبجايا لا كشيمى وبندرانيكا وكاينج تسنج ومن المتوقع ان تضاف الى قائمه حاكمات الدول تاكاكو دوى زعيمه الحزب الاشتراكى اليابانى
ولا يمكن ان يكون وصول المراه الى قياده الدول على هذه الصوره وليد مصادفه
بل هو بالتاكيد نتائج مخطط نسائى محكم بدا بالثوره على الرجل فى اوروبا واميركا ثم استئناس الرجل وتحويله الى خنفس اليف يضع الحلق فى اذنه ليعلن عن بدء عصر الرجال الاغوات
وفى السويد الان حركه نسائيه تطالب بتبادل المواقع فيلزم الرجل البيت يطبخ ويغسل ويدادى فى العيال ويحضر الرضعه
وفى الوقت ده تتفرغ المراه للعمل وشغل المناصب العليا دون الرجل
وسوف تصل المراه السويديه الى اهدافها لان الرجل هناك مؤدب ومهذب ومطيع واليف جدا
وهى خطوه سوف تعقبها خطوات جديده الى ان تستولى المراه على العالم ليصبح حكمها عنصريا يقوم على اضطهاد الرجل تشفيا وانتقاما وسوف تظهر الجماعات النسائيه المتطرفه لتنادى بوجوب التخلص من الرجل بالمذابح الجماعيه حتى تسلم البشريه من شروره
فمنذ الازل وهو يشعل الحروب ليحرق قلوب الامهات ولابد ان امبراطوريه النساء سوف تسخر التقدم العلمى لنقل الحمل من بطن المراه الى بطن الرجل وسوف يموت فى هذه التجارب العلميه مئات الالوف من الرجال ذوى البطون المنفوخه
وسوف تنشط لجان حقوق الانسان تناشد حاكمات العالم بوضع حد لاباده الرجال
غير ان الرجال من جانب اخر سوف تتكون بينهم جماعات تطالب بالمساواه مع الجنس الحاكم
وسوف تتضاعف المنظمات السريه التى تقود حرب تحرير الرجل عن طريق العنف
ومن الاخبار التى سيطالعها القارىء فى ذلك الزمن القادم
اكتشفت السلطات المختصه فى كشاكاوانيا عبوه ناسفه فى قلم روج السيده رئيسه مجلس الوزراء الكاشاكاوانى
وتم ابطال مفعولها قبل لحظات من تناول رئيسه الوزراء لقلم الروج لتطلى شفتيها والمعروف ان السيده رئيسه وزراء ليمونيا راحت ضحيه حادث مماثل
اذ تم حشو باروكاتها بماده ناسفه
وقد اعلنت منظمه الموت للنسوان مسئوليتها عن الحادث

مين فين ايه ليه يا ايمى تعملى كده ليه !!!

ولا كان على البال ولا على الخاطر جانى تاج من اخت عزيزه عليا

الا وهى ابله ايمى واسمحيلى انى اقولك يا ابله

نبدا منين انا مش عارف اقولك ايه بس يا ايمى

يعنى لازم تبعتى البتنجان ده

ده انتى كده عاوزه تكدرينى يا ساتر ههههههههههههههههه

مش عارف انا احسبن عليكى ولا اعمل ايه انا دلوقتى

يالا القصد اهه واجب كلفتنى بيه ابله ايمى

يارب اطلع شاطر واعرف احله

لما ادخل فى الموضوع عشان ماطولش كتير

السؤال الاول علل يعنى افصل

هل محلات الجزاره بتبيع لحمه ههههههههههههه

خلاص خلاص احسن انضرب

لما ادخل على التاج احسن تقول عليا مشاغب وانا سيرتى عناب هههههههههههه

أذكر ستة أسرار قد لا يكتشفها من يقابلك لأول مره!!!؟

اولا يا اخوانا صعب اوى حد يعرف عنى حاجه اول ما يقابلنى اول مره

لانى بتعامل معاه على اساس انى اعرفه من زما ن

وديه بتعملى مشكله مع الناس لان اللى اعرفه واللى ما اعرفوش بهزر معاه هزار تقيل اوى

وفيهم كتير مش بيتقبله وبيعتبره نوع من الاستخفاف او انى مستقل بيه وانى بتريق عليه

بس انا مش كده خالص لانى من عادتى احب الناس جدا وبحب اتعرف على اى حد مهما كان

لكن الحمد لله لما يقعد معايا كتير بيعرفنى اوى والحمد لله بيحبنى جدا

انا من النوع الاجتماعى احب الضحك والهزار

مش بحب الحزن وماحبش الناس النكديين

احب اتريق على اى حاجه ولكن فى سبيل الهزار

ماحدش يعرف ياخد معايا لاحق ولا باطل لانى ممكن اكسبه فى الكلام

ناس كتير بيفكرونى مغرور

بس جد انا مش كده ممكن عشان اسلوبى فى الهزار

ماعنديش حاجه اسمها جد الا فى اوقات قليله جدا لما اكون متنرفز وصعب جدا انى اتنرفز

وكل الكلام ده صعب جدا ان حد يعرفه اول ما يشوفنى

اللى بعده

سبع حاجات نفسك تعملهم!!!ا

ولا نفسى اعمل تصميم لاحد عمله ولاحد يقدر يعمله بعدى

نفسى اشارك فى الفريق الهندسى الذى يقوم بالتوسع فى الحرم المكى

اتمنى اخلص الكليه بتقدير جامد كده امتياز مثلا يبقى موز موز موز جيد جدا اشطه جيد ما يضرش مقبول وماله ضعيف البس الطرحه واقعد فى بيتنا هههههههههههه

انى اخطب اول ماخلص واتجوز علطول البنت اللى بحبها

انى اروح الامارات وخاصه دبى وربنا يسهل

انى احج اكتر من مره لبيت الله الحرام

اشترى سياره لامبورجينى هو حلم طبعا بس برضه ربنا يسهل هههههههههههههه

غيره

سبع حاجات معرفتش تعملهم!!!ا

انى ادخل هندسه بترول

احفظ القران

اكمل لعب كوره منها لله الثانويه العامه

انى اصحى بدرى اصل نموسيتى كحلى ههههههههه

ابطل حب الكوره وطبعا الريد ديفلز

ماعرفتش احب الزمالك مع ان عيلتى من كبيرها لصغيرها زملكاوى ايون عدو يعنى ههههههههههه

مش عارف اتخلص من العاده المصريه وهى العشوائيه مابلتزمش بحاجه حالى كحال معظم المصريين

وضيف على كده انى مش عارف ابقى جد ربنا يستر ههههه

اللى بعده

سبع حاجات دايما بتقولهم !!!؟

هههههههههههههه

واخد بالك

شوف شوف

موز موز موز

ايه يا عم البتنجان ده

لخص / انجز

ايون

سلامووووووز وبايلاموووووووووز

اخر حاجه

غيره

سبع مشكلات فى حياتك ممكن تحلهم بالفلوس!!!

مش اى حاجه تتحل بالفلوس

ولكن ممكن اساعد الفقراء

ابنى مساكن للشباب

اجيب فرص للعمل

اسافر اعيش حياتى

ولكن طبعا المهم هو طاعه الله ورضا الوالدين وحب الناس ودول مش بالفلوس

اللى بعده

سبع أماكن بتحبها!!!

اولا المسجد بحس انى فى ملك تانى خالص بالزات لو المقرىء كان صوته حلو

ثانيا مدينتى المفضله وهى القاهره

ثالثا طبعا هى القهوه

الشارع

احب اروح كل الكليات

الجلوس امام النت فى الاوضه

اخرج مع اصحابى فى اى مكان

غيره

سبع أشخاص بحبهم غير بابا وماما واخواتى!!!

دول كتير اوى ولكن المقربين جدا منى اكيد هم اصحابى

القرشى فلانتينو

عبده برايز

الفنان هشام

يحيى بيكاسو او ابليس

عبس المخبر

الكومى دياب

رمزى وحسن

والمدونين

وغيره كتير وانا بعتذر لو كنت ما جبتش سيره حد بجد كلهم حبايبى

اللى وراه

سبع حاجات بتحبهم قوى!!!

التصميم المعمارى ويا سلام بقه وانا ماسك القلم ومعاه الورقه وعمال برسم حاجه موز موز موز

الخروج مع اصحابى بالدنيا ومافيها

القاعده على القهوه ويا سلام بقه على الحجرين لما يكونوا متكلفين هههههههههههههههههههههههههههه

النت

بحب المحشى وياا سلام لو كان بتنجان ولا كرنب ههههههههههههه

الكوره

استمتع بابداعتكم وكتابتكم فى مدونتاكم

غيره

سبع مدونات بتحب تقرالهم!!!

هو انا من عادتى كسلان

وما بحبش اقرا

بس طبعا اجى عند المدونات وما اقدرش ما اقراش

ولكن هتقوللى مين احسن سبعه هقولك

.......................................

كل اللى بيزورونى وبزورهم

ايون االلى الود موجود ما بيننا ههههههه

اللى بعده

تمرر الواجب/التاج لمين؟

اقول ولا بلاش بلاش احسن حد يدعى عليا

وانا فى قفا دعوه ههههههههههه

كل اللى يدخللى وماكنش عنده التاج ده ياخده

واللى مش هيعمل الواجب هكدره

بالزات المدعوه ايمى قصدى ابله ايمى ههههههههههههه

ارجو ان اكون قد اتعسناكم

وخلصنا الواجب على خير

وياريت الدرجه تبقى فى السر

مش عاوزين فضايح

ماشى يا ابله ايمى ههههههههه

يالا تحياتى بيبـــــــــــــــــــــــــو

هى ديه مصر يا عبله

فعلا يا اخوانا حاجه تدعو للفجر ان المصرى القديم يصل الى درجه كبيره جدا من العلم التى اهلته انه يحفظ الطعام الاف السنين وذلك باكتشاف قوالب الزبده الفرعونيه ومن قبلها الجبنه البيضه ( ايون حلايب وكمان شلاتين وكله يمشى ) وبها بكتيريا صالحه للتخمير

وهذا يعد اعجاز علمى بكل المقاييس كان لازم ولابد ان تهتم به اجهزه الاعلام اهتماما خاصا لتعرف الدنيا من نحن ومن نكون ؟؟؟؟؟

احنا ولاد الناس الطيبين خوفو وتحتمس واحمس واخناتون ورمسيس وغيره كتير من الاسره المالكه

ولكن فى ناس بتقول علينا احفاد متخلفين وان سبب تخلفنا هو تفاخرنا المستمر والمتجدد بالاجداد والاهرامات والكرنك وقوالب الزبده ههههههه

سيبوكوا ( نفضضوا ) من العالم دول يا اخوانا اكيد هم ناس حاقدين !!!

هناك ايضا من يقول اننا اللى هم الاحفاد بنلبس ثيابا باليه عليها اثر العز القديم ونقدم انفسنا الى المجتمع الدولى على اننا من اكبر عيله فى التاريخ

وبرضه صدرلهم الطارشه حتى لو كان ردهم علينا .... طظ

فنحن من عالم حديث لا يعترف باولاد الزوات من العائلات العريقه كما انه عالم يستنكر ان يعيش الانسان على سمعه القديم

ولكن اطمئن يا باشا ده احنا احفاد الفراعنه ولك ان تفخر كامل الفخر بانك حفيد الفراعنه (ايون فرعون بس لسه شمرط هههههههههه)

ونحن لا نقل عظمه عن الاجداد فاذا هم كانوا استطاعوا حفظ قوالب الزبده من الاف السنين فانا مش محتاج لذلك الان

لان ببساطه عندى ديب فريزر يحفظلى قوالب الزبده وهو فى متناول كل الحاجزين بالدور او بالوساطه ؟

واذا كان الوزير امحوتب رائد الفن المعمارى ( اه زيى كده بس انا هكون فى العصر الحديث اللى احنا عايشينه )

ومصمم هرم سقاره اعتبرته الحضاره الاغريقيه

فوق البشر لعبقريته وعبدوه بالفعل الها للطب والسحر والفلك

فنحن الاحفاد ايضا عندنا الوزير العبقرى الذى تعبده حضاره بنى همبكه وتقيم له الطقوس وتحرق له البخور

واذا عايرك احد بان نسبه الاميه بلغت 70% بين احفاد الفراعنه وهم اول من اخترعوا الكتابه فى التاريخ

فرد قائلا باننا ايضا ابتدعنا كتابه تصويريه كالهيروغليفيه

فالهلال معناه الحزب الوطنى

والنخله معنناها الوفد

والنجمه معناها حزب العمل

والمفتاح معناه حزب الاحرار

اما البتنجان فمعناه الكوسه

واذا قيل لك ان الاجداد قد برعوا فى علم التحنيط الذى لا يزال سرا كيميائيا مستغلقا

فتفاخر عليهم لاننا نجحنا فى صنع المومياوات او الانسان المحنط ( ادخل كده اى مصلحه حكوميه وانظر الى الجالسين على المكاتب )

واذا كان الفراعنه روادا فى اكتشاف الامراض وعلاجها

فان طب الاحفاد لا يزال سابقا ايضا الى اكتشافات جديده

اخرها ذلك المرض الذى يصيب الانسان بالاسهال مع العطش الشديد والمغص وصعوبه البلع واصفرار الوجه وزيغ العينين

وذلك عقب تناول زيت التموين

ولا تجعلهم يشككونك فى نسبك

بالتاكيد نحن ابناء قدماء المصريين فمن المؤكد انهم لم يعثروا علينا على باب جامع يعنى

نحن ولاد الناس ونحن من اعرق الاسر البشريه اولاد الزوات وعن وجه الشبه بيننا وبين ابائنا الاوائل فهو قوى جدا

امشى كده فى القريه او المدينه وسوف تجد كل الوجوه طبق الاصل من سنفرو ونفناو ونخت وسى تى وتى تى ولا تبالغ فى الاختلافات

الاختلاف الوحيد بيننا وبينهم هو مساله الوقت فنحن مثلا نرى ان التانى واجب وهم كانوا فى عجله من امرهم وكانوا بيحرصوا على الوقت

بطريقه غريبه فلم يعرفوا المسلسلات ولا اغانى عدويه ولا الشاب المتتامر وحتى زيهم الفرعونى الشهير الذى يكشف الجزء العلوى من الجسم روعى فيه مع بساطته وملائمته للجو واختصار فى اللبس والخلع

بل هو اسرع زى للبس اذ قورن بما نرتديه

نحن فى ريفنا البنش والصديرى واللباس ابو دكه

فالبنش فيه على الاقل عشره ازرار قطن والصديرى خمسه عشر زرار ويتطلب تزرير وفك الاتنين خمس دقايق فى المتوسط يوميا صباحا ومساء اى 30 ساعه فى السنه اى يحتاج الانسان كل خمس سنوات الى سته ايام تزرير وفك الازرار ( غير العطلات الرسميه والاجازات )

وكان المصرى القديم يعرف ان القفا المصرى العارى يسبب المشاكل اذا امتدت الي هذا القفا يد غريبه الامر الذى سوف يضيع الوقت فى الخناق ( وزى ما غناله محمود عبد العزيز اه يا قفا اه يا قفا اه يا قفا ) فكان غطاء الراس الفرعونى ذو الخطوط العريضه يغطى القفا

بينما البنش بلا ياقه كما ان اللاسه لا تغطى القفا الامر الذى جعل اقفيتنا هى ابرز ما يظهر منا بوضوح شديد

وهو امر غير مستحب بل ان اهتمام المصرى بالوقت بلغ مداه

فاصبح اول اختراع فى التاريخ لقياس الزمن

المزاول او الساعه الشمسيه ويقول احد العامه ان المصرى القديم قدم خدمه للتاريخ لا تنسى بابتداعه اول وادق تقويم سنوى فى العالم اخذه عن الرومان ثم صار الامر لكل تقويم وبفضل اختراعات ابائنا اصبح فى يدينا ساعه نعرف بيها وقت التوقيع للانصراف عن العمل

وعلى كل حائط نتيجه نعرف بيها موعد القبض اول الشهر وموعد الاجازات والعطلات

كذلك كان المصرى القديم يحدد مكان النوم فى الفراش فقط ولم يكن يعرف ان لجسمه عليه حق وان الانسان يمكن ان يرتاح وينام فى اى مكان

وان يرفع شعار مطرح ما ييجى فى عينى النوم انام وانا مرتاح البال

وما كان معيبا بالامس صار مباحا اليوم وهو النوم فى العسل قصدى فى الممنوع والوقوف فى الممنوع والسير فى الممنوع

واذا كنا لا نعمل فلعل ذلك يقنعك باننا فعلا اولاد زوات واولاد الزوات لا يعملون

فقد شقى اباؤنا من اجل راحتنا وتركوا لنا ريعا سنويا من الاهرامات والكرنك وتوت عنخ امون

قبل ما اختم كنت احب اقدم لكم الفنان هـــــــــــشام الشهير بسلس المصرى

احد المصريين الذين بداوا يتخزوا مسار الغناء فى هذه البلد الجميله

وقد احتل المركز الاول فى مسابقه هيل ميكرز

التى تقدمها سنويا على موقعها الرسمى

وله عده اغانى وانشاء الله نازل باغانى جديده

وهتسمعوا عنه قريبا جدا باذن الله ولو اى حد عاوز يسمع صوته

هيلاقي اغانى له فى التراك ليست

وبينى وبينكم كده هو انشاء الله هيكون اجمد من الشاب المتتامر

كفايه ان ماعندوش شعر صدر عشان يبينه هههههههههههههههههههه

معلش على الاطاله

ولكن هى دى مصر يا عبله

القديم ....... و........ الجديد ... !

دائما وابدا تتعاقب الاجيال وتختلف دائما طريقه التفكير
وحسب الدراسات العلميه التى اكدت ان الاجيال الجديده اكثر نضجا واكثر قدره على التفكير
يعنى مفيش حد يعرف يغلبهم فى الكلام .. ايون عيال غلابويه ولمضين
والمهم انهم بيسموا كل ده بال روشنه
يعنى وضعوا شويه اسئله كده من اللى قلبك يحبها علشان يشوفوا العيال هتعمل ايه
المهم كانت الاسئله لتلاميذ صغار فساله وقاله
ماهو مذكر دنيا ؟ ورد التلميذ ردا ذكيا اثبت فيه ان اسلوب تفكير الجيل الجديد يفوق بمراحل واضعى الاسئله
فقال بايجاز
ليس لها زوج نعرف اسمه
فالواد الصغير سال واضع السؤال وقاله انا لقيت والدى بيدندن فى اغانى عبد الوهاب وبيقول فى اغنيه الجندول
قلت والنشوه تسرى فى لسانى هاجت الذكرى فاين الهرمان
ولان الاهرامات عندنا تلاته وهم خوفو وخفرع ومنقرع .. فقاله طيب خوفو وخفرع موجودين
طب فين بقه منقرع ؟
فرد عليه وقاله يابنى انا قريت القصيده كتير ووصلت انه كان بيصور نفسه عاشقا وكان يتذكر هرما واحد وهو خوفو اللى كان يجلس تحت سفحه وهو يابنى كان فرحان اوى وكان شرب حاجه صفرا بتجعل الانسان ينظر الى الشىء الواحد فيراه اتنين وهكذا نظر الى خوفو من خلال خياله فوجده اتنين وعندئذ تسائل اين الهرمان فلو قبلت هذا التفسير خير وبركه ولو ماقبلتوش فانا ماعنديش تفسير غيره خصوصا ان هرم منقرع ماتسرقش ضمن الاثار المنهوبه كل يوم
وياريت لو اى حد منكم عنده تفسير فليتفضل به الى ساحه المعركه
وفى الواقع ان الصغار لهم لمحات تدل باستمرار على ان الاجيال الجديده اكثر تفتحا وتطورا مثلما حدث فى هذا السؤال عندما طرحوه على الصغار وجاء فيه
امامك قطعه لحم قسمها الى نصفين ثم نصف النصفين ثم نصف نصف النصفين ... الى اخره
وكانت الاجابه
نصف - ربع - 1/16 وظل يكتب فى القسمه ثم كتب والان لايمكن قسمه قطعه اللحم اصغر من ذلك بعد ان اصبحت هبورجر !
وردا على سؤال اذكر شهرا به 28 يوم قالوا كل الشهور بها 28 يوم
وعندما سئلوا ماذا قال يوليوس قيصر عندما طعنه بروتس فجاء الرد
قال متوجعا اى اى
ولما قال اذكر خمسه اشياء تحتوى على اللبن كان الرد
الزبد والجبن والايس كريم وبقرتان !
وردا على مساله حسابيه عن ام لديها اربع حبات بطاطس وخمسه اطفال وتريد ان توزعها بالتساوى على الاطفال الخمسه فقالوا
تطبخها مهروسه هههههههههههههه
وعندما قال عن نتائج اكتشاف القطب الشمالى فقالوا ان دروس الجغرافيا اصبحت اكثر سخفا
ولما قالوا اذكر اختراعا لم يكن موجودا قبل 15 سنه كان الرد
انـــــــــــا
وفى سؤال ماذا تفعل لو كنت مليونيرا
ترك التلميذ ورقه الاجابه بيضاء وقال هذا ما افعله
وعملوا امتحان فى الاخلاقيات
فقال اعطاك رجل مائه دولار لكى تحفظها له ثم مات ماذا تفعل
قال اصلى من اجل ان اعثر على رجل اخر مثله
وجاء سؤال اكمل لويس الرابع عشر كان مسئولا عن ...........
فكان الرد كان مسئولا عن لويس الخامس عشر
وجاء فى احد الاسئله ادخل كلمه يحلل فى جمله مفيده فكانت الكلمه كبيره على العيال
فقال احدهم طلب منا المعلم ان نبحث عن كلمه نحلل فى القاموس

وزمان كان الناس ما يبطلوش النق والحسد فكانوا دائما يتسائلوا لماذا تتقاضى الراقصه فى ليله واحده ما يتقاضاه مفكر فى سنوات ؟
وطبعا ظل هذا السؤال عالقا الى ان جاء واد من الشباب الروشه وعرف يرد عليهم وقال
اذا اتينا الى الراقصه وجدناها تؤدى مهمتها بالساقين والقدمين والكتفين والصدر والوسط والارداف والرقبه ولا بد من حركه الحاجبين واحد طالع والتانى نازل وحركه الشفتين ضروريه لزوم الدلال وغمزه العينين لزوم الاغراء حتى الشعر المنسدل على الكتفين يؤدى دوره ع الخدود يهفهف ويرجع يطير يعنى كل اعضاء الجسم تؤدى الرقصه الامر الذى ينفرد به الرقص الشرقى عن اى مهنه اخرى ولهذا استحق الاجر العظيم لانه يتطلب جهدا من اعضاء الجسم جميعا لا يستطيع ان يؤديه اعظم اعلام الفلاسفه والفكر
فقد ثبت ان مفكرا عظيما كارسطو كتب كتابه الكون والفساد وهو يستعمل ذهنه فقط ولذلك استحق اجر تفكيره الذهنى فقط
ولم يثبت ان نظريه الدراما وهو بيهز وسطه
ولم يقم دليل على انه كتب الاورغافون على واحده ونص
وما استحق اجرا عظيما من لم يتقصع ويهز الصدر والارداف
ومن يجد تفسير اخر فليدلى به
معلش بقه طولت عليكم

والله وعملوها الرجاله على نفسهم

كنت امنى نفسى ان ارى الفريق الابيض الشهير بنادى الزمالك او القلعه البيضاء كما يحب بعض الزملكويه ان يطلقوا عليه وان اراه يفوز ويرد الهزائم المتتاليه والمتلاحقه للنادى الاهلى لكن مثلما قلنا من قبل عشم ابليس فى الجنه
ولكن ما احزننى بالفعل هو الحاله التى وصل اليها الجمهور الزملكاوى او الابيض
حيث انهم خرجوا بعد المباراه والابتسامات لا تفارق اوجههم ( صحيح البعيد ما عندوش دم ) حيث انهم فرحوا فرحه الاهبل بالتعادل
مع العلم انهم كانوا فى امس الحاجه الى الفوز واقتناص الثلاث نقاط لكى يحافظ لهم على كامل فرصهم فى الصعود الى الدور التالى
ولكن مع بدايه احداث اللقاء شاهدت موقف غريب جدا انى حسيت بان الزمالك داخل الماتش وهو مهىء تماما للهزيمه حيث لم يمضى عشر دقائق نظرت بعيناى ووجدت الكره ( بتزرغت ) داخل الشباك ايه يا اخوانا ايه حصل .. الاهلى جاب جون وطبعا كما يفعل الزملكاوى فقد الامل تماما ان فريقه يقدر يعوض واخدذ يدعى ربنا ان يخرج باقل الهزائم ( يعنى تلاته اربعه )
ولكن يا لرحمه القدر الذى لعب دورا كبيرا جدا فى تعادل هذا النادى حيث استطاع لاعب نادى الزمالك فى احراز هدف التعادل والشوط الاول يلفظ انفاسه الاخيره
ويبد الشوط الثانى وجميع الاهلويه يتوقعون رؤيه الاعصار الاحمر الذى يلملم من يقف امامه ولم يمضى عشر دقائق الا ونظرنا ووجدنا الكره داخل مرمى النادى الاهلى
وفى هذا التوقيت وضعت يدى على قلبى خوفا من صحوه لاعبى النادى الاهلى الذى كان خارج نطاق الخدمه ( اظاهر ان الشبكه كانت ضعيفه )
ولكن لم يخب النادى الاهلى من امال جماهيره واستطاع بفضل نجومه ان يتعادلوا مع هذا الفريق المسمى بالزمالك
تعالوا نتكلم عامى شويه ااصلى مش بحب الكلام المزوق ده
قبل الماتش يا اخوانا لقيت كل الزملكاويه الخوف هيموتهم ومرعوبين بس لازم الكبرياء يلعب دوره
لقيت كل واحد بيضرب رقم انهم هيكسبوا الاهلى واحنا محروق دمنا من الكلام بس واثقين من نجومنا
واول ما بدا الماتش وبدا ببشرى اسعدتنى شخصيا وهى اصابه نجم الدفاع الهانى ابن سعيد قلت بركه يا اخوانا بدايتها عنب
شويه والماتش بدا واول ما بدا كام هجمه عنتريه كده من الغانم والعبدالله ولكن طبعا بلا تاثير على الامير
وبعديها علطول لقيت الكوره بتزرغت فى عبد الواحد اللى جابوه من الدار للنار اصل بعيد عنكم عبد المنصف بقى بينحس الفرقه
فبيوقفوا عبد الواحد فى القمم المهم الواد فلافيو عملها وجابها فى الشبكه بصيت ولقيت اخوانا الزملكويه نزل عليهم سهملله
وخلاص بداوا يستعيدوا زكريات الماضى والهزائم المتكرره واللى خلاص اتاكدوا انها هتحصلهم وبدا الاهلى يمسك وسط الملعب تمام التمام
ومافيش اى بروبليم خالص واللعب بدا يبقى ممل لحد ما جيمى فض الاشتباك وجاب جون للزمالك بس جون ايه جامد مووووووووووز
لان الكوره جات للاسامه اللى قطع الشورت لوائل وكلمه قطع الشورت يعنى رقصه ونيمه على الارض وحطها لجيمى اللى خد الشادى فى غرزه كده بترقيصه على الطريقه العالميه وفى الجون علطول
بصيت جمبى يا جماعه لقيت فعلا الزملكويه هيموتوا من الفرحه مش مصدقين انهم هيطلعوا فى الشوط الاول متعادلين
المهم فى الشوط التانى كنت فاكر ان الاهلى هيصورج ( هيبهدل ) الزمالك ولكن حصل العكس لقيت العيال بتوع الزمالك نازلين بروح
ووالله فرحتلهم من قلبى وقلت اخيرا العيال حسوا انهم بينتموا لنادى وخلاص فاقوا وهيلعبوا كوره
المهم اخوانا جابوا جون بقياده الاجوجو وهو جون غريب كده عامل زى بتاع البلاى ستيشن يعنى ما يدخلش فى حارس ممتاز
بس هنعمل ايه ما عندنش غيره الامير وهو لاحول له ولا قوه
بعديها الاهلى انتفض وافتكر ان هو بيلعب مع نادى بلغه الكوره كده متمرمط منه فى اخر خمس سنوات
فعاد ليبحث عن كبريائه امام هذا النادى المهلهل وبالفعل الزمالك غلط والاهلى استغل الغلطه وجاب جون بوصفه بانه مزيكا من المعلم ابو تريكه
لانه جابه بعينيه بص لعبد الواحد فى زاويه وحطهاله فى التانيه جون مزيكا بجد
وبعد كده ماتش فى قمه الملل
ولكن لازم اهنىء الزمالك فعلا كنتم رجاله وتستحقوا التعادل ولولا ان اللى بيدربكم ده مدرب تعبان كنتم فزتم بالماتش
بس يالا خيرها فى غيرها مع انى اشك ان الاهلى هيلعب بالتراخى ده مره تانيه
طبعا بكره كلنا هنسمع كلام من الزملكويه والاهلويه كتير
ان الاهلى ساب الماتش عشان الزمالك يصعد وان الزمالك ليه ضربه جزاء وان الحكم ده ابوه اهلاو منذ ان كان رضيعا ووالدته من مشجعى الدراويش فكان محايد الراجل جه يظلم هنا ظلم هنا
ماعلينا المهم خرجنا حبايب وماحدش زعل
بس كلمه للزمالكويه
انتم يا اخوانا وصلتم لمرحله صعبه اوى جه بيكم الزمن انكم تتمنوا التعادل مع فريق انتم المفروض كنتم بتكسبوه وبكل ثقه
دلوقتى التعادل معاه يعنى الفوز ليه النظره ديه
اتمنة ان يعود الجمهور الزملكاوى الى حظيره تشجيع فريقه مره اخرى وان يثق كل الثقه ان فريقه مهما عمل
مش هيكسب الاهلى ليه ؟؟؟؟؟؟؟؟؟
عشان انتم وش فقر والفقرى هيفضل طول عمره فقرى
يعنى والاهلى نايم خالص مش عارفين تكسبوه يبقى هتكسبوه امتى لما يصحى
كانت فرصتكم وانتم فرطوا فيها
ربنا معاكم يا زمالكويه
كان معكم بيبـــــــو الاهلاوى
وبدون تعصب

والله وعملوها الرجاله على نفسهم

بكره تتعدل !!!!!!!

منذ الصغر وانا من اكبر مشجعى النادى العريق نادى البطولات الا وهو نادى الزمالك حالى كحال باقى افراد العائله التى تعشق هذا النادى الكبير والعريق واللى بنسميه دايما فى مصر احد قطبى الكره المصريه ( على اى اساس انا مش عارف ) ثم حدث ما جعلنى فى الزمن الاخبر ده ان اكف عن هذا التزملك اذ تعرض النادى لسلاسل من الهزائم المشينه والمعيبه فى حق النادى وجمهوره والمشكله انه بقى بيتغلب من طوب الارض مثل نادى فابريكه المكرونه ونادى شركه النداغه ( اه بتاعت اللبان ) ومراكز الشباب بدايه بمركز شباب ابو العلا نهايه بمركز شباب قحافه وده الامر الذى كاد ان يصيبنى بكافه امراض الدم والاعصاب وفى تلك الايام العصيبه والصعبه اتمسك شاب ماشى جنب نادى الزمالك وظللوا يضربوا فيه وهو بيحلف بكل الايمانات انه نشال مش لاعب فى نادى الزمالك فسابوه لحاله

ثم جائنى الاصدقاء الزمالكويه بيحاولوا يرجعونى اشجع هذا النادى الفظيع مره تانيه فخطرت فى بالى فكره حلوه اوى وكان لازم انفذها

لماذا لا اساوم مثل ما يفعل بعض اللاعين بناديهم ؟

ليه ما يدفعش ليا الزمالك مبلغ محترم حتى لا انتقل الى تشجيع نادى اخر !!!!!!!

لقد جاء الوقت الذى يحصل فيه كل شجع على كامل حقوقه فالمشجع هو اهم اهم اطراف اللعبه واقلهم حظا ورزقا وبعدين هو معرض اثناء الماتشات للاصابه بكافه الامراض ابتداء بالعته ومرورا بالضغط والسكر وانتهاء بالانهيار العصبى والسكته القلبيه

ولا بد وان يكفل اتحاد اكره حقوقه فيحصل على استغناء من ناديه مع دفع خلو رجل للنادى الجديد الذى عليه ان يتكفل بسداد جميع ديون المشجع وتوفير شقه متواضعه له على النيل وسياره صغيره وياريت لو كانت بى ام ومعاملته معامله اللاعب فى المكافات والاجور وليس فى الخصومات لان المشجع بيتعب اوى يا اخوانا

فمن المدهش ان المشجع يتحمل التزامات ماليه باهظه بلا مقابل

فهو يشترى المواد الضروريه لحضور الماتشات الحساسه مثل الطوب والحجاره والزلط كما انه يضحى بالكثير من ماله الخاص فهو لا يفكر فى استعاده رهن الزجاجات الفارغه بتاعه البيبس ويحدفها على دماغ الحكم ( الطوبه من مدرجات البنات على راى الناظر )

مثل هذا المشروع ( كفاله حقوق المشجع ) كان يمكن ان ينصف تلك الفئه البائسه التى تظل تعوى فى الملاعب وفاء وحبا فى النادى ولاعبيه

وكمان غير كده وكده هتكون فرص عمل جميله جدا تستوعب الكثير والكثير من افراد الشعب

غير انى لم اجد اى حماسه من الزملا المشجعين فاستقريت على عدم تشجيع اى ناد وانى اكتفى بالتعاطف مع المنتخب الوطنى الى ان وصل المنتخب الوطنى الى التصفيات المؤهله لكاس العالم فعدت امارس التشجيع غير ان الفريق القومى بدا يهز اعصابى ويضيبنى بالغباء الكروى فهو يوم فى العالى ويوم فى النازل لا راسى على مستوى ولا مقياس وكثيرا ما سالت نفسى وانا بتفرج على المنتخب هل الكوره تطورت عندنا عن زمان ؟

واكتشفت ان التطور الوحيد اللى حدث هو ان اسماء اللاعبين اصبحت قابله للنشر اصل اسمائهم زمان كانت من عينه السكران والعضاض ولوفا وخيشه

وكان زمان اطلاق اسم على اللاعب يتم لسبب وجيه فمختار التتش مثلا اطلق عليه المدرب الانجليزى هذا الاسم لانه كان ضئيل الجسم يقفز برشاقه واطلقوا على محمد حسن حلمى اسم زامورا عندما سدد كره فى شباك الحارس المرمى الاسبانى زامورا

وتقليدا لحلمى والتيتش بدا كل لاعب يبحث عن اسم غريب لان الاسماء الجميله لا تصلح للملاعب

وفى الخمسينات مثلا عرضوا على احد اللاعبين هذه الاسماء الاهتم - فلايه - الجربوع - الرفاس - طريشه وغيره

غير ان اللاعب راى ان كل هذه الاسماء لطيفه وشيك وانتهى به الامر الى ان يسمى نفسه ببيبـــــــــــــــــو

لم يعد غير انى اوجه نداء الى النادى الذى طالما عشقته الا وهو نادى الزمالك وبقوله فرحونا شويه يا اخوانا حرام عليكم الاهلويه كلوا وشوشنا

اكسبوهم بس مره واحده وبعد كده اخرجوا مافيش مشكله

وطبعا هذا هو لسان حال جميع الزمالكويه وده عشم ابليس فى الجنه

لن يتبقى الا الدعاء لنادى الزمالك عل وعسى ربنا ينصفه ويكرمه ويعملها ويتعادل

اللهم انصرنا

امين

اللهم قوى من عزيمتنا

امين

اللهم هب لنا من لدنك كورنر وبلنتى وهجمه مرتده

امين

اللهم ابعد عنا الاصابات

امين

الشد العضلى وبلع اللسان وتمزق الاربطه

امين

اللهم دمر الفريق الاحمر زو القلب الاسود تدميرا

امين

يبقى يحلها حلال

قريت زمان ان كان فى عادات افريقيه كانت غريبه اوى فى الجواز فقالوا ان فى ليله عقد القران وقبل الدخله كانوا بيقيدوا العريس فى الفرح بسلاسل من الحديد ويتلم حول ابو العروسه واخوها وعمها ورجاله عيليتها كلهم ويبداوا يضربوا فيه لحد ما يبانله صحاب ولو قال اه او بم حتى ساعتها كل واحد هيروح لحاله هو الغرض من كل ده انهم عاوزين يشوفوا ويقيسوا مدى احتمال الزوج المنتظر للحياه القاسيه اللى هيعيشها مع عروسته ( يا جدع تغور العروسه على اللى عاوز يتجوزها بتاع ايه يعنى انضرب ليله الدخله وينهد حيلى لا يا عم بلاها جوازه )

زمان فى اصعيد كان ابو العروسه يجلس امام الفحم والنار وييجى ليه العريس عشان يطلب منه المحروسه فيتعمد ابو العروسه ان يسقط الفحم من الجوزه اللى بيشرب فيها فيقع على الارض وهنا لازم ولابد وحتما ان العريس يمسكها بايده ويضعها على الجوزه لابو العروسه ولو كان الاب رخم وغتوت كده شويه يسيبه والنار فى ايده ويرسل فى تغيير الجوزه وهنا العريس ما ينفعش انه يرميها على الارض وانما يظل قابضا عليها بايديه والاب يكلمه فى غتاته ويساله فى سماجه ويقوله انت جهزت البيت والفرش والنحاس والعريس يجاوب عليه وهو بيتقطع من جوه وايديه خلاص بتسح ولكن لو وقعت منه النار هتطير منه العروسه فهو فى عرف الصعايده قديما رجل فافى مش عارف يمسك حته نار بايديه وبرغم غلاسه العادات ديه فانها لا تخلو من المعنى انهم يريدون ان يثبتوا ان الرجوله تحمل وصبر وهاتان القيمتان تعتبران من اهم القيم الانسانيه التى نمارسها فى هذا الشهر الكريم فى شهر رمضان التحمل والصبر ولا نستطيع ان ننكر ان الجوع والعطش فى حياه الصحراء الخشنه والشمس الحارقه والجفاف الرهيب كانا من اهم اختبارات التحمل والصبر اما فى ايامنا هذه فلم تعد المساله مساله جوع وعطش وانما الاختبار الفعلى للصبر والتحمل بيبدا بعد مدفع الافطار حيث يصاب التليفزيون بحله هيستيريه ... من برامج ومسلسلات وافلام واعلانات والى ان يضرب مدفع الامساك ( الى عمرى ما سمعت صوته )

هنا يلتقط الصائم نفسه ويفرح فرحه المقبل على لافطار وانقلبت الايه فصار الافطار مشكله والصيام هو السهل وصارت الوجبه التليفزيونيه التى يقدمها التليفزيون اشبه بالوجبه الفاطميه التى كانوا يقدمونها للناس فى ايام رمضان وكانت تسمى بالسماط حيث كان الخليفه الفاطمى يجلس فى الديوان الكبير وامامه موائد عامره عليها اطباق يبلغ طول الطبق منها قامه الرجل .. يعنى واحد فى طولى كده يمدد فى الطبق ويقيل له شويه ماهو بيتعب اوى وفى هذه الاطباق العملاقه اطعمه فائحه الرائحه وهبر من اللى قلبك يحبها اما الخبز فكان يصف على حواف الموائد كل رغيف يزن ثلاثه ارطال يعنى الناس ايامها كانت بتاكل عيش صحيح مش زى الايام دى

ولا انسى ليله رمضان ونحن ننتظر الهلال حيث ثبتت غره شهر رمضان فى اليوم التالى وارتسمت على وجه امى ابتسامه واسعه لم ارى مثلها فى حياتى وقالت لى اسمع عوزين ننزل بقه نجيب الحاجه بتاعه رمضان قلتلها هو رمضان لمح لك بحاجه قالت لى ما تهزرش لازم نملا البيت من خيرات الشهر الكريم ده ومسكت ورقه وقلم وهاتك يا كتابه على حاجات رمضان ولم تترك صنفا لم تتذكره واخذت اعد فى النهايه ما كتبت فوجدت ان هذه السيده الطيبه تستطيع بسهوله لو اتيحت لها الفرصه ان تقضى عل المجاعه فى الصومال وما شابهها وتستطيع بسهوله ان تقضى على تحويشه عمرى

وجاء رمضان وفعل التليفزيون مثلما فعلت امى بالضبط حمسميت صنف ومش عارف اكل ايه ولا ايه ؟؟ فالبوفيه مفتوح عالبحرى ودخلت القنوات الفضائيه ايضا وعملت موائد الرحمن هيه كمان ويبقى الاكل مرطرط وللركب شفت كلمه فوازير تجعلنى افكر فى ان اكتب فزوره بجائزه ضخمه تقول الفزوره .. اذكر ما عدد الفوازير التى تعرض على شاشه التليفزيون وفى الذاعه ؟؟؟ وليا صاحب استقال من عمله ويعمل حاليا حلال فوازير ولا تستهينوا به او تسخروا منه فهذا الحلال لو ضربت معاه محدش هيبقى زيه ولا حد حيعرف يكلمه هيبقى مليونير

وهو حاليا فى حاله طوارىء رهيبه قافل على نفسه الاوضه وقدامه التليفزيون وجنبه الراديو وقاعد بيقلب فى القنوات وفى اللمحطات وقدامه ورقه وقلم ودوسيهات وعامل دوسيه لكل فزوره وتدخل عليه امه بكبايه الشاى لتضعها بجانبه وتقول له ربنا يوفقك يا حلال يابنى ( راسمه على تقيل اوى ) فيجيب عليها فى عصبيه ششششت عاجبك كده اديكى ضيعتى عليا فزوره الشرق الاوسط

وام حلال مؤمنه جدا بما يفعله ابنها وكل اولادها الحلالين ولذلك فهى دايما ماتربى ابنها الاصغر على حل الفوازير ولانه لم يتجاوز السادسه من عمره وليس مؤهل بما يكفى فقد الحقته بالناشئين ليتدرب على الحكايه منذ نعومه الاظافر ولذا تجده جالسا وبشكل دائم امام برنامج بدون كلام كنوع من التسخين والاعداد وحتى تنمى بداخله النباهه الفوازيريه مثل اخواته الحلالين وبعد نهايه الشهر الكريم واعلان نتيائج الفوازير مسحت ام حلال دمعه نزلت من عينيها وقالت تاثر الواد حلال سقط فى فوازير القناه التانيه مع انه حالل كويس قلتلها معلش يعوضها فى رمضان الجاى بس خليه يركز

▒▒♥▒▒♥▒▒♥▒▒♥▒▒♥▒ ▒▒♥▒▒♥▒▒♥▒▒♥▒▒♥▒ ▒▒♥▒▒♥▒▒♥▒▒♥▒▒♥▒

كل عام وانتم بخير ▒▒♥▒▒♥▒▒رمضــــــــــــان♥▒▒كـــــــــــريـــــــــم♥▒▒♥▒ ▒▒♥▒▒♥▒▒♥▒▒♥▒▒♥▒ ▒▒♥▒▒♥▒▒♥▒▒♥▒▒♥▒ ▒▒♥▒▒♥▒▒♥▒▒♥▒▒♥▒ ▒▒♥▒▒♥▒▒♥▒▒♥▒▒♥▒

مخطوفه ......... مخطوفه منك

تيجوش نرجع كده مع بعض يجى كام الف سنه كده ونبص ونشوف صوره جدى قدام عنينا وهو بيجرى فوق الجبال وفى ايده عصايه وبيصرخ فى الفضاء كالعبيط وبيضحك لاتفه الاسباب ويخبط الارض بقدميه متفجرا فى الضحك حتى يكاد قلبه انه يتوقف وده بيحصل لما يشوف الديناصور واقف قدامه وبياكل فى دراع جدتى ....
والحقيقه ان جدى ماكنش همه فى الدنيا الا الاكل والشرب والقباحه ( ايون الفرجه على اللى رايحه واللى جايه ايون المزز )
ماكنش فيه تفكير لا فى شهاده ولا اى بتاع خالص وازاى يعنى هيفكر فى شهاده او حتى يقرا جرنال وهو عايش فى العصر الحجرى اللى كان فيه الجريده ما يقلش وزنها عن طن ايون كان من غير الملحق اللى لو سقط على راس جدى هيبقى وجبه للقبيله كلها
وجدى ماكنش مهتم بالثقافه خالص حيث انه يادوبك خلص سنه تالته حجرى وطلع من الكهف وماكملش
اما جدتى بقه فديه غيره خالص ايون كانت حاسه بنفسها
حيث انها امراه فاتنه وصارخه الجمال وفائره الانوثه زيها زى زينه واشد منها كمان
وبعكس جدى كانت لجدتى ميول موسيقيه مبكره ( لا مش رقاصه )
وهى بقه كانت زكيه شويه وده وضح اوى وهى بتثقل موهبه الغناء والصوت الجميل عند جدى ( ايون ماسكه ودانه ليل نهار بينموا )
وكانت مغرمه انها تسمعه صوتها الجميل والبيه اللى هو جدى ييتسلطن ويغنى معاها اهاته الحراقه اه اه ولا يستطيع جدى ان ينكر انها كانت بتساعده فى شد شعر صدره او وضع اصابعها فى اذنه او انها تولع النار فى رجليه ( قال ايه بتهزر معاه ) ولكن قبل لقاء جدى البدائى وجدتى البدائيه ازاى حصل اللقاء اصلا
قالوا العلماء ( ايوه علماء انتوا ما تعرفوش جدى ده يبقى مين ولا ايه ) ان الزواج مر بمراحل كتير اوى تعبت اوى يا جدى
اولها مرحله الزواج بالخطف فكان الانسان البدائى يسرق المراه اللى عاوز يتجوزها وكان الرجل حينما يقرر الزواج ما يكلفش نفسه ويروح لاهل العروسه ويجيب تورته ويبقى وشه فى الارض ووهيقبلونى ولا حماتى هتقعد تبصلى من فوق لتحت وتكرشنى فى نهايه السهره ولكن كانوا بيصحوا من النوم ويطلع طلعه الزواج والطلعه ديه يمشى فيها جدى من صباحيه ربنا فى الغابه ويقعد يدور على بنت الحلال فلو لقاها
ياخدها من شعرها ويروح مجرجرها على الكهف وكده خلاص بقت حلاله لا مازون ولا قايمه
بس ازاى جدتى واهلها يوافقوا ان الجواز يكون بالخطف كده يعنى البنت لما تكبر يطلقوا سراحها فى الغابات وامها تدعى لها
امتى يا ضنايا هتتخطفى واشوفك متشاله على كتف عريسك وبيجرى بيكى على كهف الزوجيه
وواحده تانيه تقول يا ميله بختك يا بنتى تلات مرات تتخطفى وترجعيلى
لكن جدتى يوم خطفها وهى على كتف جدى وهو بيجرى بيها على الجبل كانت نينا بتودعها بنظره حنون وهى تقول لها ربنا يحمييهم لسه مخطوفين وجدتى تغنى وهى على ظهر جدى وتقول
مخطوفه ..................... مخطوفه منك مش قادره مش قادره اقولك
وبعد فتره الخطوفه يقوم جدى باخفاء العروسه اللى هى كانت جدتى شهر كامل فى احد كهوف ايجار جديد لحد ما قرايبها يملو من البحث عنها وده اللى احنا حورناه فى العصر بتاعنا وقولنا عليه شهر العسل
وفى الايام البعيده ديه هم شهرين وتلاقى جدتى بقت حامل ممكن عشان الطبيعه كانت لسه بخيرها لا فى تلوث ولا شكمانات عربيات ولا غيره وكانت جدتى تضع ابنها فى الكهف بمنتهى البساطه لا سونار ولا مستشفيات ولا اجهزه شفط ولا دكتور ولا اى بتاع
وكان جدى هو اللى بيولدها عشان كده كانوا بيموتوا كتير لان اسلوب جدى فى الخطف كان بييتبعه فى الولاده برضه فكان بيخطف العيل ويضحى بالام ماهو جاله الواد
كان العيال فى العصور ديه لو عاشوا بيعتبروا ساعتها ولاد القبيله كلها من غير تحديد اب او اى ارتباط بنسب شفتوا المصيبه يعنى الواد هيقولوله يابن القبيله يعنى جدى اللى عمال اكلمكم عليه ده مش جدى انا عارف من اول المقال وانا مش مستريحله
انا لا اقبل ان اكون ابن الجماعه مهما حدث
وافقت من شرودى على صةت واد صاحبى فى التليفون بيعتذر عن المجىء عشان الجماعه تعبانين شويه قلت له منزعجا جماعه مين يا عم انت يا عم ؟
قاللى فى سماجه جماعتنا يا سيدى وفهمت انه يقصد مراته يا للسخافه والرخامه اكتر شىء يضايقنى فى حياتى لما واحد يقول على مراته الجماعه
طب ازاى وهى مفرد وكمان مؤنث ويفرستى اكتر الزوجه اللى تنادى على زوجها بدلع سخيف كده بابى يعنى الحكايه مش ناقصه لخبطه
ونسيب الزواج بالخطف ونروح لتطور تانى فى مراحل الزواج وديه مرحله الزواج بالشراء وهنا بقه الرجل يشترى اى واحده عجباه ولو مش معاه يدفع عربونها والاستلام بعد تانى دفعه من التقسيط
وقد بدا الزواج بالشراء المصريون القدماء وقرينا فى بعض البرديات فى عقود الزواج الصرى ان الزوج بيدفع فى زوجته اربع تيران وتلاتين فرخه وست ديوك وكام فستان والدهب ايون اللى احنا بنقول عليه المهر والشبكه
ولحد دلوقتى هتلاقوا العاده ديه موجوده فى الشعب المصرى بالزات فى الافراح الشعبيه بتلاقيهم يضعوا الرايات والجهاز والمراتب على عربيه كارو ويقعدوا يغنوا ويصقفوا ويفضحوا العريس فضيحه الطاهر
ولكن يحسب للمصريين القدماء انهم ماكانوش بيغالوا فى الاسعار فكان هناك برديه فيها نص بيقول ان تمن العروسه فستان من الكتان الابيض ... يا بلاش ... اهى دى اللى عاوزاه تعيش
قلت ده فى يوم لفتاه حتى لا تدخل على طمع قالت باننى لو نظرت لاى مقبره فرعونيه لوجدتها ممتلئه لادهب والاحجار الكريمه اللى وضعها زوج المتوفيه فى قبرها
فقلتلها يديكى طوله العمر وشوفى انا هعملك ايه فى تربتك ده لو لقيتيها مش هخليكى ناقصه حاجه هجيبلك قبر بكل منافعه ايون فيه ميه ونور وكمان تكيف يالا ياستى ولا حد قدك
بس الست زمان كان ليها تمن برضه
تخيل كده وانت نايم مع مراتك ونط عليكم حرامى طبعا مش هيلاقى حاجه فى البيت يسرقها غير مراتك وساعتها لما تيجى تروح لوكيل النيابه مش هتكون جنايه خطف واغتصاب لا يا باشا هتبقى جنحه سرقه يعنى اهه برضه هتلاقى الحرامى مزنوق فى قرشين قال يسرق مراتك ويبيعها مش اكتر
واصل المشكله انه كان اشترى مراته من حوالى خمس سنوات ولما جه يبيعها كانت نزلت فى السعر جامد فى السوق كان فيه ستات جديده نزلت فالموديل بتاع مراته انضرب هههههههههههههههههههههههههه
وعليه فانى ضد الزواج بالشراء يعنى اشترى الواحده من دول بالغالى والنفيس وكمان سنتين الاقيها بسعر التراب فى السوق
كما انى ضد الزواج بالخطف
هنا ابتسم فى مراره صديقى العازب والوحدانى وقال فى ياس انا يا سيدى ما اعرفش اخطف واحده ومش معايا اللى اشتريها بيه انا عاوز احب واتحب وعاوز الاقى الانسانه عذرا لن اكمل كلام صديقى اصل صوته ضاع من اذنى وظل يتكلم بحراره ويبربش بعنيه كانه يحيى شاهين القس حينما احب سلامه وظللت اراقب حركه شفتيه وتعبيرات وجهه كانى قافل الصوت وانهى صديقى السينيمائى بسؤال الحب مش كفايه عشان نبنى حياه ؟!
قلت له عند ام انص فسالنى باستغراب مين قلتله ام انص وده تعبير جديد يعنى فى المشمش
الواقع اختلف يا باشا كل بنت عاوزه الزواج والراحه وما تحبش الشقاء
وجدتنا اياها حينما استعبطت وتركت جدى الاكبر يخطفها ولم يكن امامه فرصه خطف افضل .... ولا تتصور حفيدها اليوم اقل ذكاء من جدتى ... التى استسلمت للامر الواقع وقعدت فى الكهف بجوار الراجل اللى جرجرها من شعرها واذا كانت جدتى الفرعونيه قد رضيت بفستان من الكتان الابيض وعاشت مع جدنا الفرعونى اللى كان يطلع من صباحيه ربنا مع الاف العمال ليحملوا الاحجار عشان يبنوا الاهرامات والمعابد ويعود ليجدها تزرع وتحصد واجدع من اى راجل تانى وانت لو رجعت اليوم مش هتلاقيها لانها غالبا اما عند الكوافير او فى النادى او عند مامتها بينتفوا ريش سيادتك
الحكايه يا هندس مش حكايه حب الحكايه اعنق بكتير واخطر بكتير
المراه هى الدافع وهى المحرك لكل انجازات وابداعات جدنا العبيط اياه فلولاها ما صنع لا مجد ولا بنى بيت ولا كتب شعر ولا بصبص لاى بنوته معديه قدامه ولا خطفها
ولذلك فمن عند المراه تبدا الحكايه وانا احدد نجاح الرجل لما اشوف مراته على راى المثل وراء كل رجل عظيم ... اعداء يحاولون تدميره


بص بقى حضرتك معايا شفت الجزمه سورى الشوز البناتى اللى طالعه جديد قد ايه ؟
انا بس بحزرك اصلها قد كرسى الحمام وهى بقه مش لابساها لا دى واقفه عليها
يابنى شايف سعادتك الجراه التى تتكلم بها هتخرم عنيك بصباعها
انت عارف ليه اختفت جرائم الخطف والاغتصاب ؟
مش عشان الاخلاق عليت لا صدقنى الرجاله بقم مرعوبين مش من العقاب
لا ده من البنات يا صاحبى
انتى عصر الزواج بالخطف خلاص اللى كان بداه جدى من الاف السنين وخايف احسن نكون قادمين مره تانيه على ايام الزواج بس المره دى بالشراء واللى ماعهوش ما يلزموش
كنت اقول هذا لصديقى وانا اتحسس بيدى جيوبى الفارغه ( اصل جيب المنطلون كان مقطوع ) لاكتشف انى لا املك سوى قروشا بسيطه ما تشتريش حتى الفستان الكتان الابيض

مواقف الخطوبه المحرجه " عندما تسالك خطيبتك عند الكبابجى يعنى ايه مخاصى "

خدعوك فقالوا ان الخطوبه فتره تعارف .. عشان تعرف اى شخص على حقيقته لازم تحتاج حياه حقيقيه وتكون قائمه ولفتره طويله وتحتاج الكثير والكثير من المواقف

والخطوبه زى ما عارفين هى الفتره التى يقضيها كيس الخضروات المجمده مع كيس اللحم المجمد بعد خروجهم من الفريزر حتى يذوب الثلج ويبدا الاندماج الحقيقى عندما يصبحان فى اناء واحد مع حبه ملح وفلفل وعلى نار هاديه ( ايه جو الاكل اللى دخلنا فيه ده )

فقط المواقف الكوميديه هى هى اللى بتدى طعم لايام الخطوبه وتفتح مساحه للمزيد والمزيد من الحب والتفاهم والاندماج خصوصا لما تلاقى الكوميديا ديه ناتجه من مواقف محرجه

_يعنى تقف انت وخطيبتك فى مكان عام ويلفت نظرك احد الاشخاص بمظهره الكوميدى وتبدا فى فاصل من( التريقه)
وبعد ما تلفت نظرها ليه تلاقيه جاى ناحيتك وانت بتقوله مين" خالى حسن "

_تحددلك خطيبتك موعد عشان تعرفك على صديقاتها (وانت ما بتصدق ) فبتروح فى معادك زى الساعه .. تركن العربيه وبعد كده تبص بعينك تلاقى واحده زى القمر ( اه مزه ) راكنت جمبك بعربيتها تبصلها البصه وتضحكلها الضحكه والمهم انها تتجاهلك وتتفاجىء انها صاحبه خطيبتك ( ربنا معاك ساعتها )

_تجلس مع خطيبتك فى مكان عام وجمبيكم واحده كبيره بتضحك بصوت عالى بيميل للخلاعه ( ايون هيهيهيهيهيهيهيهيهيه)
وكل لما تقرب لخطيبتك وتقرب اللحظه الرومانسيه تروح الست ديه ضاحكه صحيح زى ما قالوا عليها ارشانه

_عندما تدعوها على العشاء وتكتشف بعد ما تاكل ان انت نسيت المحفظه والمشكله الاكبر ان خطيبتك ما يكونش معاها فلوس والاسوا من كده ان الموقف ده بتكرر معاك ( ابقى اتعلم تغسل الحلل والاطباق )

_ماشى بعربيتك وجمبك خطيبتك وتصيح فجاه " بص اوضه الليفينج اللى فى الفاترينه دى " فتلتفت لثوان فتخبط فى العربيه اللى قدامك وينزل الباشا اللى راكبها ويفتح صوته فى وشك وانت تنقل النظر بينه وبين وجه خطيبتك ولسان حالك بيقول شفتى يا هانم وصلتينا لايه عليا الطلاق مانا جايب اوضه ليفينج وحقها هصلح بيه العربيه وهدخل بيه المستشفى ده لو كانت الخناقه مع بتاع تاكسى

_عندما تتاخر عن موعد رجوعك بخطيبتك الى بيتها فتلاقى الاب فى انتظارك تسلم عليه وقبل ما تمشى يقولك عايزك دقيقه ويكون دايما الحوار ساعتها هتخلصنا امتى يا بيه وتتجنز

_عندما تكتشف ان خطيبتك ما بتشتكيش من الام الضروس الا لما تكونوا لوحدكم ( فقر من يومك )

_عندما تسالك خطيبتك عن اجمل ما فيها وتقعد تفكر عشان تقولها اجابه رومانسيه وتقول لها لون عنيكى فترد عليك وتقولك ( بس دول لينسيز)

_عندما تتفق مع خطيبتك على حضور فرح احد اصدقائك وتلبس المع واروش فساتينها وعلى باب القاعه تكتشف انه فرح اسلامى ( ساعتها امسك صاحبك ده واخنقه )

_عندما تكتشف ان اسعار الاجهزه وقطع الاثاث اللى اتفقت عليها مع اهل خطيبتك انك تشتريها مش زى ما كنت بتتخيل او تعرف نتيجه قله خبرتك ويكون عاديا انك تسمع جمله مثلا ( هو فيه حاجه دلوقتى بالف جنيه )

_يوم الخطوبه تكتشف ان دبلتك مش موجوده فى الشبكه وانك نسيت تشترى واحده لنفسك

_عندما تكتشف ان خطيبتك عندها حساسيه من اى حاجه وانت بتستقبلها بالورد فتقولك انا عندى حساسيه ضد الورد وتيجى تولع السيجاره تقولك عندى حساسيه فى الصدر والسمك بيخليها تهرش وحبه فراوله فى التورته تصيب جلدها كله ببقع حمراء والافلام الرومانسيه تفجر الدموع فى عنيها " ده ايه الجوازه الغم ديه "

_تذهب مع خطيبتك الى كبابجى شهير ويقدم ليكم المنيو وفيها اسماء لقطع اللحوم ( موزه , نيفا , مخاصى , طحال , الخ )
وتسالك خطيبتك وبصوت عالى .... يعنى ايه مخاصى ؟!!!

_اتفقت مع خطيبتك على الخروج وتمر عليها فى البيت وتلاقيها لابسه ملابس واضح انها بتاعه البيت ( ايون على راحتها ) فتقولها انجزى والبسى علشان فتقولك بكل برود مانا لابسه اهه !!!!!!!!

_عندما تحاول انك تبص على مزه معديه فى مكان عام وتظبطك خطيبتك وتوجهلك سؤال بسيط ( بتبص على ايه يا بيه )

_لما صاحبتك بتاعه الكليه زمان تتصل بيك على الموبايل وانت خلاص كنت نسيتها بس رجعت تظهرلك تانى واتصلنت بيك كتير وانت قاعد مع خطيبتك ومش راضى ترد المحرج ان خطيبتك تسالك ليه مش بترد ؟ ويبقى نهارك اسود لو خدت منك الموبايل وردت هى

_تغلق تليفوناتك عشان تتجنب مثل هذه المكالمات وتفتحه فتلاقى خطيبتك اتصلت بيك وبتسالك وهى متوتره سيادتك قافل موبايلك ليه انشاء الله

_تجلس مع خطيبتك فى مكان عام وتضحك فجاه فتقولك بصوت عالى " الراجل التخين اللى وقع هناك دا وقع الاكل فتبص ليه فتلاقيه باصص لكم وهاين عليه يقوم ياخدها قلمين

_لما تكون قاعد مع حماتك وخطيبتك داخله عليكم بالشاى وهى بتصبلك الشاى يقع عليك ويغرقك لحد هنا عادى المحرج ان لما حماتك تقعد تشد فيك وهى بتقول لك اقلع البنطلون ( ايون المنطلون لا المنطلون اه يا لذيذ يا نايطى ) اسم النبى حارصك وصاينك

_لما تكتشف ان خطيبتك انت مسجلها على الموبيل باسم " Elmozza"

_لما تلاقى الجو مناسب فى الشارع بعد سهره رومانسيه وانت وخطيبتك فى العربيه وخلاص هتروحها وتطلب معاك " قبله على السريع " واثناء انهماكك فى القبله تلاقى 2 امناء شرطه واقفين لك بره العربيه ومستنيينك تخلص

امتى المصرى بيبقى رايق كده ومبسوط

الانسان المصرى شخصيه غريبه جدا من اقل حاجه بيفرح حتى لو كان عنده هموم الدنيا كلها يكفيه حاجات بسيطه جدا وهتلاقى البسمه مش بتفارقه عشان كده احنا اخف دم فى العالم
تصدقوا يعنى فى اوقات صعبه اوى وما ينفعش فيها هزار تلاقى المصرى بكل اعصاب بارده بيضحك ويهزر وان شغلتله موسيقى هيرقص قصدى من كل ده ان المصريين طيبين اوى الفرح والضحك والهزار موجود طول الوقت
امتى كده تلاقى الواد المصرى دماغه عاليه اوى ويكون رايق ومبسوط فى حاجات كتير اوى بتفرح المصرى

_ لما يضرب سيجارتين حلوين كده مع اصحابه فى اى غرزه ويا سلام لو كانت متكلفه ( لا يا اخويا انت وهو مش كوكو الضعيف انتوا فاهمينى هتلاقيها دبابيس وسماسين وبلا ازرق ربنا يرحمنا منها )
_ لما ما كينه ال ATM ( الصرافه يعنى ) تسحب بالغلط فلوس اكتر من اللى طالبها ( هيقولك ده رزق الواد اللى جاى فى السكه جايللى اقوله لا ده حتى اللى يرفس النعمه يبقى كافر )
غــــــــــــــــــيره
_لما يلاقى حد يخلصله شهاده المخالفات ( يعنى يعليله دورين تلاته كده من غير رخصه وتقع العماره ويجيبوه يقولك ساعتها ده قضاء وقدر ايه هتكفروا وتدخلوا فى حكمه ربنا يعنى ) وغيره من شهادات مزوره وديه بقت سهل اوى ( على راى المثل كيشنى ( ابجنى ) تجدنى )
_ لما ينجح يوم الخميس بليل فى التعبير عن نفسه وبقوه
_لما القناه الاولى تذيع فى السهره فيلم جديد والمهم ان الفيلم ده تلاقيه قديم مووووووووووز بس اول مره تجيبه هنقول ايه ربنا يخليك لينا يا وزير الاعلام مظبطلنا التليفزيون ربنا يخليك للغلابه
_ لما حد يجيبله وصله دش ...(ايوه اللى عمرو خالد طلع وقال حرام حرام حرام وانت كده بتسرق مجهود ناس تانيه .. طبعا حضرته قابض عشان كده اتجرىء وقال ) بس تكون 30 قناه وتكون ب 15 جنيه اكننا بننصص معاه ربنا يخليلنا الوصله والدماغ اللى اخترعتها
_ لما حد ما يعرفوش يقول فى حقه كلمه حلوه .. يا سلام ساعتها بيبقى منشكح اوى وحاسس ان الدنيا مش سايعاه
غــــــــــــــــــــــــــيره
_لما يلاغى مزه فتضحك وتستروش الملاغيه فيطورها ويروح يصاحبها ساعتها يحس انه فلانتينو وشويه ويقنع نفسه انه لازم يقدم فى مسابقه ملك جمال العالم
_ لما يلاقى عرض مجانى فى اى حته وعلى راى المثل ابو بلاش كتر منه
_ لما يقرا ما نشيت يفضح الحكومه ويفش غله منها ويقعد ساعتها يشتم فى الحكومه ويضحك
_ لما يلاقى مواصله رايقه اول ما يقرر يروح وطبعا ده ما بيحصلش لانه بيحب يركب الاوتوبيس تحس كده ان المصرى والاوتوبيس اصحاب مش عارف ليه وعمر الاوتوبيس ده ماكان رايق الله يمسيك بالخير يا زعيم ( عادل امام )
واحنا مش فى اوتوبيس يا كلاب
_ لما يقدر يصلح حاجه بايظه عنده بنفسه ومن غير ما يحتاج لصنايعى وساعتها يوهم نفسه ويقول انا باش مهندس بس لولا الظروف هى اللى لطشت فيا كنت هبقى ما حصلتش والمهم ان اللى بيصلح ده بيبقى بعيد كل البعد عن المهندس
غــــــــــــــــــــــــــــــــيره
_لما يلاقى شغل او لما يتطلب فى شغل ايه هو مش فارقه اشتغل زى ما اشتغل مش هتفرق بس اجيب تمن الدخان بتاعى
_ لما يكون معزوم فى فرح واحد صاحبه وبالزات بقه لو ماكنش متجوز اهيه فرصه ينقيله اى مزه من الفرح
_ لما يكون الفرح فيه رقاصه(الله يمسيك بالخير يا فارس وعلى اللى عملته فى الرقاصه ) ويفضل الواحد منهم يبص للرقاصه وناقص يقولها هز يا وز والكل كانه هياكلها بعينه ويا سلام لو كانت كمان حلوه شويه
_ لما امين الشرطه يسيبله الرخصه ب5 جنيه وساعتها يحلل الرششوه ويقول ده راجل غلبان وانا بساعده
غـــــــــــــــــــــــــــيره
_ لما المدير يبعتله فى مكتبه ويقول له انا مبسوط منك ساعتها يحس انه ملك الدنيا وشويه وهيمسك مكان مديره
لما يسافر ابوه وامه الحج ( اصله بيبقى عامل حساه على انهم هيجيبوله معاه وهما جايين ميه زمزم )
_العدل يفرحه اوى "مش سامى العدل طبعا " ويعمل فرح لو كسب القضيه اللى رافعها على صاحب البيت اصله عايز يخرجه عشان ايجار قديم او يجددله بالايجار الجديد والمده والراجل يا عينى غلبان
_ لو حد فى الشارع ساله عن عنوان يعرفه ... ويفضل يوصف له العنوان بالتفاصيل الممله وهو سعيد وفرحان وايه كمان يقوله انا هاجى معاك اوريك المكان ولو سايق تاكسى وعارف العنوان اللى انت بتسال عليه هيقولك ساعتها بابتسامه كده تعالى ورايا
_ لو حد فى الشارع ما يعرفوش وطلب منه سيجاره يعزم عليه بالعلبه كلها وهو مبسوط ويولع له كمان بس طبعا مش بتكون مستورده
_ لو طلع فى التليفزيون او لو اسمه اتنشر فى الجرنال حتى لو كان منشور فى صفحه الوفيات يقولك انا اتشهرت يا عالم يا بيئه وماحدش يعرف يكلمه بعد كده
_ لما ربنا يرزقه بعيل .. ايوه اسمع كلام ابوك وماتسمعش لامك
_ لما امه تدعيله من قلبها يحس ساعتها انه طريقه كله منور
_ لما يجيله عقد عمل فى الكويت ( اللى مفرجه اوى كده انه هيروح هناك مارينا مول ومجمع الشيخه والسالميه ويصطاد السمك من على الخليج ) تقولش رايح يتفسح
_ اول الشهر وهو خارج من الخزنه وجيبه مليان ومتامن ولو لمده اسبوع بالكتير اهه برضه ماحدش بينام من غير عشا واحنا فى مصر ماشاء الله الخير كتير
_ لما يلاقى حاجه عليها تخفيضات او اى حاجه مكتوب عليها 3 بسعر 2 يقول كمان الدوله عملالى ديسكاونت ربنا يخليك لينا يا ريس ياللى خليت الحاجه بسعر التراب !!!!!!!!!
_ لما يقضى مهمته بنجاح فى اى مصلحه حكوميه فى يوم واحد وباقل قدر من حرقه الدم والوقفه فى الطوابير
_ يوم ماتش الاهلى والزمالك .. يفضل طول اليوم عنده شعور بنشوه اقتراب ميعاد اذاعه الماتش .. وعلى نهايه الشوط التانى تزداد بهجته ده فى حاله انه لو كان اهلاوى او انه يسب ويلعن فى ارضيه الملعب لو كان زملكاوى اصلها هى السبب
_ غـــــــــــــــــــــيره
_ لما الحكومه تطلع جدعه وتعتذر عن اى غلطه عملتها ودى حاجه نسبه حدوثها زى نسبه ظهور ابو رجل مسلوخه وسعاد المحروقه
_ لما يلاقى مكان يركن فيه وهو فى وسط البلد صف اول وياسلام لو كان من غير سايس عشان ما ما يدفعش ويكون بعيد عن الكلابشات ودى نسبه حدوثها زى نسبه اعتذار الحكومه عن غلطتها اللى عملتها
_ لما يقدر يضحك على اللى قدامه صاحب او عدو او زوجه او واحد ما يعرفوش فى الميكروباص
_ لما يحس انه ناصح ونجح فى انه يفاصل فى سعر حاجه وخدها بالسعر اللى قاله فى الاول .. مع انه عارف كويس ان البياع كسبان كسبان
_ لما يخش جمعيه ويقبضها الاول ويخلع منها بعد كده
_ لما يقعد فى مكان مليان مزز ويقعد يبصبص لديه ويغمز لديه
_ لما يصالح اتنين متخالفين مع بعض
_ لما حد من قريبه يدخل شرطه ويقولك بقى فى عيليتنا باشا
_ لما يسدد الديون اللى عليه .. او لما يخلص اقساط التاكسى او الميكروباص او حتى التلاجه بيتعب اوى
_ لما يقضى مصلحه لواحد غيره .. خدمه يعنى
_ لما يحس انه تعبان ويروح يكشف والدكتور يقوله دا بس شويه ارهاق
_لما يشوف شعبان عبد الرحيم بتاع ما بحبش اسرائيل
_ لما تبقى فيه واحده مزهقاه وتحل عن دماغه
_ لما واحد صاحبه يدى له سى دى عليها افلام اللى بالى بالك او مسرحيه العيال كبرت او توم وجيرى اصله بيحن للطفوله
_ اكله حلوه وشويه خضار وحتتين لحمه ورز بالشعريه وشوربه لسان عصفور
_ لما يصحى براحته يوم الجمعه

يا اشتغالاتك يا مصر

تكثر الشائعات وتنتشر فى المجتمعات المقفوله والمكبوته التى ترفل حلوه ترفل ديه فى ثوب القهر والاميه ( الجهل يعنى ) مجتمعات تسمع كلمه الشفافيه فى الخطابات الرسميه ولكنها لا تراها على ارض الواقع ...
المواصفات ديه مش بتفكركم بمجتمع كلنا عارفينه وبنحبه وبنموت فيه ؟؟!!

ما علينا تعرفوا طبعا ان المصريين بيموتوا فى اصدار الشائعات هتقولى ليه اقولك لانها احدى الوسائل اللى بيرفه بيها عن نفسه ولكن طبعا المصرى معروف بذكائه انه بيقدر يميز الشائعات بسهوله لكن برضه فى نفس الوقت غبى لانه بيكون مفضوح اوى ليه ؟ لما تيجى وتسمع من واحد شائعه هتلاقيه حكالك فيلم هندى قبليها ويقولك انا كنت موجود وشفت البتنجان اللى حصل ده بنفسى وهو فى الحقيقه لا شاف ولا نيله بس هنقول ايه بنحب نهول الامور ونقول اللى ما حصلش ( هى عادتنا ولا هنشتريها ) ويجيلك المصرى ويقولك يا عم هو الكلام بفلوس قول وسيبها على الله وعلى راى المثل ابو بلاش ايه............. كتر منه واضحك بقه لو كانت الشائعه ديه سياسيه يقولك دول جايبينها على الجزيره والفضائيات بتتكلم وسمعتها امبارح فى لندن وخش على النت هتلاقيها وغيره وممكن يقويلك الشائعه ازاى ؟
انه يجيبلك اقاربه من الدرجه التالته اللى شغالين فى الحكومه او فى جهات امنيه زى مثلا ( انا ابن خالتى خطيبته ساكنه فوق واحد مراته يبقى ابن عمها شغال فى امن الدوله ) ودايما يختملك كلامه باستغفر الله العظيم والله اعلم عشان ما يخدش الذنب.
نيجى لاشهر الشائعات المصريه

نال عمرو دياب بصفته سوبر استار الطرب فى الوطن العربى شويه حلوين كده من الشائعات اشهرها انه مصاب بمرض الايدز ولو لاحظتوا انتشارها كان عامل ازاى بسرعه غير عاديه ( بسم الله ماشاء الله الناس ما بتصدق يا هندسه ) واحلى حاجه ان عمرو رد بالبوم ما تخافيش ققال ايه بيطمن جمهوره عليه
طبعا كلنا فاكرين شائعه ان بهاء سلطان ( اه بتاع قوم اقف وانت بتكلمنى ) انه جاسوس وانتشرت فى وقت غريب اوى قبل البومه ب 3 دقايق وعرفنا ان منتج الالبوم نصر محروس هو اللى اطلق الشائعه عشان يروج للالبوم ولما جه الناس يسالوه قالهم جاسوس ايه يا اخوانا ده عيل غلبان
نيجى لمحمد فؤاد وشائعه وفاته فى حادثه عربيه واسمحولى انى اقول عربيه .. واللى زود الشائعه بعد فؤاد عن الساحه الفنيه فى الوقت ده ولما جينا نشوفه فى التليفزيون عشان نعرف هى صح ولا اشتغاله لقينا البيه فؤاد قاعد فى لندن بيتفسح واحنا هنا حارقين فى دمنا ويا ترى مات ولا لا ( عليا النعمه شعب غريب )

جه وقت انتشر فيه شائعه القبض على المطرب الكويتى عبدالله الرويشد والممثله العايده رياض فى قضيه اداب وانتشرت بقوه بعد الغزو الشهير بتاع العراق للكويت ولكن الرويشد عمل حاجه حلوه اوى انه جه القاهره وغنى اغنيته الشهيره " اللهم لا اعتراض " وهى الاغنيه اللى قدمته للجمهور المصرى ونفوا ساعتها الشائعه

نيجى بقه للشائعه اللى هزت مصر والوطن العربى كله وهى خروج صلاح قابيل من قبره بعد دفنه بعده ايام وانتشرت هذه الشائعه بعد وفاه قابيل وكل الصحف حققت فيها وتم نفى الشائعه تماما بس فى ناس جم وقالوا ان سبب خروج الشائعه هو حب الجمهور الكبير اوى لقابيل ولكن ناس كتير قالوا ان قابيل دفن ولم يكن متوفيا

شفتوا فيفى عبده قالت ايه انا عندى عندى فلوس لو وقفت عليها هشوف جنوب افريقيا !!!! ليه يعنى اذا كان اللى بيتكلم عبيط واهبل فالمستمع عاقل وبرياله وقالوا برضه عن طنط فيفى انها وضعت لمبه نيون فى قبرها اصلها بتخاف من الضلمه بس معلش نسيت ناقص نحطلها كيتو ونغنيلها ونقولها ناموس عمال يقرص يا اخويا مش عارف انام منه يا اخويا طبعا الحل عندك وهو انك تحطى الكيتو ما تخافيش يا فيفى انتى داخله جهنم بموتوسيكل ريسينج بس امانه ليكى ابقى ادينى لفه

اما نانسى فقالت انها تمتلك كلب فى بيتها ومسمياه محمد فرد عليها البيه وقالها وانا عندى اتنين واحد اسمه نانسى والتانى عجرم كان ناقص تقوله اخاصمك اه ونفت نانسى الكلام ده بس ده على مين لاقينا المصريين طالعين وبيقولوا احنا شوفنا اللقاء ده على الهواء والله حصلت معايا ناس قالولى اتفرجنا على البرنامج ( ونعم التهجيص )

وكاظم قالوا عليه انه مصاب بالكانسر وانتشرت الشائعه بسرعه كبيره وظهر انها كانت دعايه لالبومه ( ناس بيحبوا يفولوا على نفسهم )

شائعات عن علاقه عاطفيه تجمع بين اصاله وطارق العريان ( لا مش بتاع المولد ) حلا شيحه وجلاد الحراس وعمده الاهلى عماد متعب والمهذبه دينا واحمد براده وفاروق الفيشاوى ودينا وشريف صبرى وروبى ودنيا سمير غانم وتامر حسنى طب ازاى تامر حسنى عالم مش بيعرفوا ينقوا الناس اللى يطلعوا عليها الاشاعات ماله حماقى ولا رامى

اما عن الدين
فمن الشائعات التى تمس مناطق حساسه فى عقيده المصريين ... شائعه اتصال سيده باحد برامج تفسير الاحلام وكان ضيفه احد الشيوخ وطلبت المشاهده من الشيخ تفسير الحلم اللى هى شافته فى منامها قال ايه شافت انها انجبت طفل وصعد للسماء ورضع من القمر فطلب منها ان تقسم ( اهه هيعيش ويعيشها ويعيشنا معاه فى الدور ) على صدق رؤيتها فاقسمت فقال الشيخ ( لقد ولد المهدى المنتظر واصبح يوم القيامه وشيكا ) ههههههههههههههههههههههه ضحكت يوميها ضحك لان لاهو ولا غيره يعرف حاجه وكل ده زى ما قلنا كلام فى الهواء اشتغالات يعنى ماحدش عارف يوم القيامه قريب ولا بعيد لكن هاييجى واحد ويفتى ومش عارف ايه بجد ماحدش يبصله وما اكثرهم زى النجم العمرو بن خالد اللى قالك ان ابليس مش هيدخل النار بجد ساعتها كنت بشد فى شعرى اللى مش ناقص

شائعه عن انتشار اسبراى ( رش يعنى ) يرسم صلبان على الاقمشه عند رشه وعن قيام مجهولين برش هذا الاسبراى على ملابس المحجبات والمنقبات طب وهيرشوه ازاى بالاسلكى ولا يكونش الانترنت بقى بيتوصل بالملابس

شائعه الرسائل الدينيه المتداوله اللى بيقوم حاملها من نسخها وتوزيعها على خمسين من معارفه لا ويقولك ايه ده اللى يغيظك لو ما ارسلتهاش لخمسين هتشوف ايام سودا وهيطلع عين اللى خلفوك ولو ارسلتها هتسمع خبر حيلو فى خلال ثلاث ايام طبعا كله تخاريف كلام هجص ( هتشلونا والله بالعبط اللى انتوا فيه ده ) على راى المثل كبر الجى وروق الدى لو جالك رسايل من ديه

شائعه الفتاه الاردنيه اللى مسكت المصحف وداست عليه وقطعته لان امها كانت بتزعجها لما تقراه وقالوا انها تحولت الى مسخ

شائعه المزه اللى كانت لابسه ملابس مثيره وراكبه ميكروباص ( طيب واحده زى ديه هتركب باص ليه عشان تشد الزبون يعنى ولا ايه ) ما علينا نكمل وشافها احد الناس اللى هم متدينين ونصحها بالتحجيبه بصتله وعلت صوتها وشتمت ومش عارف ايه المهم انها على ما وصلت انا سمعت حاجتين ناس بيشتغلونا ويقوا انها اتحرقت والتانيين بيقولوا انها ماتت علطول نصدق مين انا مش عارف

نيجى للاخت شرين واغنيتها اللى هى بعتبرها اكبر شائعه وهى ما شربتش من نيلها ولو شربت يبقى لازم ترجع لها تانى ولو كانت المقوله مظبوطه كان زمانا عايشين وسط اللى استعمرونا يعنى تيجى تبص من الشباك لا يا حلو مش هتلاقى السفاره الاسرائيليه هتلاقى سفاره الهكسوس وجارك التانى من المغول والتالت مش عارف من العدوان الثلاثى ولا ايه ركزى يا ابله شيرين شويه

شائعه ان التفل المصرى اذكى تفل حتى يصبح عمره سته اعوام ويقولك ايه ديه دراسه عالميه لا نعرف مصدرها تلاقيها تبع هيئه المؤسسه العالميه لحموم اللسان ومركزها بولاق ابو العلا طب سؤال
وليه حتى السادسه وازاى هيتحول من ذكى بالفطره لغبى يعنى الواد لما يبقى عنده 6 سنين وساعه بيبقى غبى وكان قبليها بساعتين ذكى ركزوا يا اخوانا شويه

شائعه ان مصر ام الدنيا وفرنسا ام اللمبى !!!!!!!!!

مقوله الفنانه صباح ( اللى ما اتجوزتش رشدى اباظه ما عرفتش يعنى ايه رجاله ) عشان كده صباح بتتجوز كتير لانها مش لاقيه زى الرشدى او لان رشدى اتجوزها وهى مزه وزى القمر ولما كبرت وبقت بتريل على اى واحد وتتجوزه الواد بيقرف منها ويسيبها عشان كده قالت رشدى ومش رشدى قلنا ايه كبر الجى وروق الدى

شائعه ان الست الشهيره بكوكب الغناء ام كلثوم كانت بتحشش قبل ما تغنى عشان تتسلطن

شائعه انور وجدى اللى دعا ربه انه يديله مليون جنيه ويجيله السرطان فجاله الاتنين مع بعض فى اقل من عام واحد
بركاتك يا عم انور

شائعه ان طاقم الطباخين فى قصر الملك فاروق كان بيضرب الحمام المسلوق فى الخلاط ويقدمه كشراب للملك طيب وهو كان فيه خلاط ايام الملك ويا ترى كان محشى رز ولا حاجه تانيه هى مصر باظت من شويه

شائعه فيلم جنسى بطلته مطربه عربيه كبيره مع ممثل اشتهر بادوار الشر والبرنسات .. والجميع يؤكدون ان الفيلم حقيقى ولو قلتله طب وانت شفته يقسملك ان صاحب ابن خالته شافه

شائعه وفاه البت العسا اللى اسمها توته بطله كليب بابا فين ( انا توته ... توته مين ... اخت بوته ... بابا فين ) فى حادث ماساوى وبعد كام شهر لقيتها طالعه فى كليب زى القرده

شائعه تعاقد نادى الزمالك مع اللاعب البرازيلى العالمى روماريو وتلاقيه واد معفن من بتوع مركز شباب الحبانيه

شائعه دويتو شاكيرا وحماده هلال

مايكل جاكسون يشهر اسلامه وقد انتشرت هذه الشائعه بعد سنوات نت الشائعه التى قالت ان جاكسون سب العرب وقال عليهم حيوانات وان كنا احنا حيوانات فانت شبه البرص الذى فقد اهله فى ساوث افريكا

شائعه تفسر بيبسى وتشرحها من اجل مقاطعتها وتقول الترجمه هى اختصار لجمله ادفع كل قرش لا نقاذ اسرائيل اللى يغيظك اوى ان بيبسى ديه شركه عالميه طيب ياعم ياللى طلعت الشائعه ماكنتش قلت قرش ايه يعنى اوروبا والدول المتقدمه عندهم القرش كنت مشتها مليم يا راجل

وشائعه تقول انك لو وضعت كلمه كوكاكولا الاجنبيه امام المراه ستقرا لا اله .. لا محمد بالعربيه

شائعه ان محلات سينسرى مملوكه لليهود .. وقد نجحت هذه الشائعه فى تشجيع الجمهور على مقاطعه هذه المحلات الى ان رحلت عن مصر ومعاها خسائر ماليه رهيبه

شائعه عن نوع من الدبابير المهجنه فى معامل اسرائيل وكذلك الشائعه ان اسرائيل اطلقت هذه الدبابير فى منطقه العريش وهى تقوم بنقر النخيل واختراق قلبه وبذلك تموت النخله خلال ايام ( العلم نور برضه )

شائعه ان مطاعم ماكدونالدز بتجيب نصف ما تكسبه وتتبرع بيه لاسرائيل يوم السبت ( العيد عند اليهود ) يالا خليهم يهيصوا وينبسطوا

شائعه قرار تحويل الودائع الدولاريه الى ودائع بالجنيه المصرى كده بدون سبب ( اصل الجنيه المصرى ليه هيبته قدام العملات الاخرى )

شائعه انتشرت بسرعه ان احد انواع الشاى المعروفه تسبب العمى ورغم ان تم تكذيب هذه الشائعه الا ان هذا الشاى اختفى بالفعل وعلى راى المثل حرص ولا تخون

شائعه الونش اللى اتسرق من ميدان التحرير واتضح بعد فتره ان ماكنش فيه ونش اصلا وان الونش دخل مصر على الورق بس ( يعنى اتسرق برضه )

شائعه عن واحده بتطلع بليل فى الطريق وهى مبلوله تطلب منك جاكت لترتديه وتعطيك عنوانها لتمر عليها وتاخد جاكتك وعندما تذهب اليها فى منزلها يستقبلك والدها ويقول لك كان على عينى يابنى بس بنتى ماتت من خمستاشر سنه

شائعه ان كاتيا اترهبنت ( ربنا يهدى الجميع )

شائعه ان نجوى كرم قالت ساقطع اصبعى اذا ارتفت بالشهادتين

شائعه ان عبد الرحمن منيف هو كاتب الحقيقى للروايات التى كان يصدرها الصدام

شائعه ان عبد الواحد السيد راح الاهلى ( مش عاوزينه )

شائعه وفاه 3 فى بورسعيد بانفلونزا الطيور

شائعه ان موقع الياهو .. يهودى لاحظ التشابهه بين الياهو واليهودى نبيه اوى المصرى

شائعه عن سيده مسيحيه خطفت بنت مسلمه من عين شمس ونصرتها

لكن ربــــــــــــــنا ستر هى ديه مصر يا عبله

الزمان : ظهر 6 اكتوبر عام 1981 المكان :
مستشفى المعادى العسكرى الدور التانى امام حجره الطوارىء
تقف السيده جيهان السادات وبناتها والدمعه بتفر من عنيهم
وكبار رجال الدوله انصرفوا منذ قليل ليجتمعوا فى مجلس الوزراء بعد ان طالبتهم السيده جيهان السادات قرينه السيد الرئيس بان ينقذوا مصر ويضعوا مصلحتها فوق كل اعتبار
على مقربه من السيده جيهان السادات يججلس كمال الشاذلى على مقعد ركبته مصابه ويقول يارب نجى الرئيس يارب
وبالقرب منه يبكى موسى صبرى وجلال عيسى ويؤمنان على دعاء الشاذلى ,
بعد لحظات من الانتظار مرت وكانها سنه يخرج رجل من خجره الطوارىء متهلل الوجه ليهتف الحمد لله الريس هيعيش وانطلقت الزغاريد وهتافات الفرح
مساء 6 اكتوبر عام 81 , نشره التاسعه مساء:
بيان رسمى يزف الى الناس ويؤكد ان الرئيس يخضع حاليا لعنايه طبيه مكثفه وان حالته ستستقر وتجاوزت مرحله الخطر
وبيان اخر يعلن القبض على جميع مرتكبى المؤامره الفاشله وبدء التحقيق معهم
مساء 7 اكتوبر عام 81 نشره التاسعه :
الاعلان عن وصول فريق طبى امريكى من كبار الاطباء العالميين بصحبه جمال بن الرئيس السادات اللى كان مسافر الى الولايات المتحده فى نفس الوقت يتم الاعلان عن قرب وصول فرق طبيه فرنسيه وبريطانيه والمانيه واسرائيليه واسبانيه (تقولش عاملين كاس عالم فى الصحه ) اه يا بلد غريبه
مساء 27 نوفمبر عام 81 :
بيان رسمى يعلنه الرئيس السادات للشفاء التام واجتيازه فتره النقاهه وعودته الى قصر الرياسه بصحبه السيده قرينته واولاده وبناته وسط استقبال شعبى حافل
ويتم فى النشره الرسميه للتليقزيون اذاعه مشاهد من العوده وبرقيات التهنئه من كل دول العالم والاعلان عن وصول عدد من كبار رؤساء وملوك دول العالم لتهنئه الرئيس بسلامته
مساء 29 نوفمبر عام 81 نشره التاسعه مساء :
يتصدر النشره خبر عن القاء الرئيس السادات لخطاب الى الامه فى مجلس الشعب صباح 1 ديسمبر عام 81 بحضور جميع قيادات الدوله والجيش وممثلين عن جميع التنظيمات النقابيه والشعبيه
صباح 1 ديسمبر عام 81 :
يقطع التليفزيون المصرى برامجه ( كعادته ) وبعد اذاعه عدد من الاغانى الوطنيه ينتقل الميكروفون الى اذاعه خارجيه من مبنى مجلس الشعب فى شارع القصر العينى لاذاعه وقائع الجلسه التاريخيه التى سيلقى فخامه الرئيس خطابه التاريخى فيها ,
فى ركن من اركان شرفه الصحافه يجلس المذيع احمد سمير ليقول بصوته الجمهورى
ايها الساده والسدات ( ليديس اند جنتل مين ) هذه لحظه خالده فى تاريخ مصر سيسجلها التاريخ باحرف من بلاتين
ننتظر معكم وصول السيد الرئيس الى مجلس الشعب ليوجه خطابه الى شعبه الذى ينتظره ويسجد لله شكرا على سلامته
بالفعل الان يصل سيادته الى المجلس ويصافح كبار مستقبليه وها هو يدخل الى القاعه ليقابل بتصفيق حار لا مثيل له من ممثلى الشعب المصرى والان نترككم مع خطاب سياده الرئيس التاريخى فليسمع الكون كله له ( على اساس ان كان عندنا قمر صناعى )
بسم الله الرحمن الرحيم
ويمكرون ويمكر الله والله خير الماكرين .
وكذلك ننجى المؤمنين والله يعصمك من الناس ....
الاخوه والاخوات ابنائى , شعبى , جيشى اخترت ان اتوجه بحديثى اليكم من بيت الشعب وقلعته من مجلس الشعب واخترت ان يكون هذا الحديث صادقا وصريحا ومن غير اعداد ولا تزويق .. حديثا من القلب .. ( اصل اللى يخرج من القلب يدخل للقلب التانى خليكم معايا ) والحقيقه مش عارف الاقى بدايه لكلامى احسن من اننى اقول الحمد لله ..
مصر بخير يا اخوانا كتب الله لها النجاه من مجهول ربنا اراد لها البقاء والاستمرار فى اداء دورها الحضارى والوقوف ضد اكل المؤامرات وانا يمكن حسيت بده وانا على سريرى فى المستشفى
واول ماربنا كرمنى كل شويه ييجى لى تقرير عن صلوات التضرع الى الله اللى كان بيقوم بيها ولادى فى كل الجوامع وكنائس مصر بعضها حكى لى عنها الاخوه فى الازهر والكنيسه وبعضها الاخر جابهولى الاخ النبوى اسماعيل
لان رجالته صوروها لى بالفيديو مع انى كنت لغيت التسجيلات وحرقت الشريط زى مانتوا عارفين
بس يعنى بقى للضروره احكام والبلد كانت على كف عفريت ما عندكوش فكره الشرايط دى قطعت فى قد ايه وقد ايه كانت بتهزنى وتاثر في دموع الناس فى التليفزيون وقد ايه حسيت بالسعاده لما سمعت بودنى الزراغيد اللى ملت مصر
وحكوا لى برضوا عن الشربات اللى اتفرق فى كل حته فى مصر
والعجول والخرفان والفراخ اللى اندبحت فى كل بيت
كل واحد وطاقته حتى اللى ما كنش قادر يفتح غير علبه تونه فتح تونه قلت لهم وماله اهو بيعبر عن فرحته بطريقته
قلت لنفسى احمدك يا رب انك سا عدتنى على الرجوع لشعبى وابنائى وعيلتى عشان مصر ما تضيعش ةتستمر قويه وام الدنيا والباقى ولادها
حسيت ان مصر كلها كانت عيله مستنيه رجوع كبيرها بالسلامه عشان يرجع لها توازنها واستقرارها
وده يا ايها الاخوه والاخوات يؤكد ان الحقد لا يبنى شيئا ولا يجد مكانا فى صفوف شعبنا الطيب وان اخلاق القريه وقيمها هى التى تنتصر فى النهايه مهما تامر المتامرون الاوغاد
وان شعبى سيظل كما عودته وتعودته قادرا فى اصعب الساعات على مواجهه التحديات بصدق وشجاعه .
باجى دلوقتى للمؤامره والمتامرين الاوغاد وانصارهم من الافنديه الارازل اللى بيموتوا بغيظهم دلوقتى
مش بتكلم على شويه العيال اللى هم مرميين فى السجن دلوقتى زى الكلاب مستنيين حكم العداله اللى لازم تقتص منهم وتستاصلهم ,
انتوا عارفين ان احنا ما بنتدخلش فى القضاء وارادته طبعا لكن انا باردد اللى جوه قلوب شعبى
العيال دولا مجرد ادوات لعقول مدبره ربنا ارد يحبطهم زى ما ربنا احبط ناس كتير مش عارف اقول مين ولا مين انتوا عارفين كل حاجه .. القذافى والاسد ودول الرفض وبتوع الصمود والتصدى ومش عارف ايه وبتوع الدقون وهيكل والعيال الشيوعيين الارازل كل دول ربنا احبطهم بقدرته وارادته ( عشان بس انا طيب وابن حلال )
انا عايز شعبى يعرف ان انا كنت مستنى اللى وقع يقع حتستغربوا طبعا والله انا كنت مستنى اللى وقع يقع حقيقه ليه حاجيلكم واقولكم ليه .. عشان مش ديه اول مره اعرف فيه محاولات لتدمير مستقبل مصر
انا صحيح اقلت النبوى اسماعيل عشان وصلتنى تقارير ان العيال بتوعه جت لهم معلومات عن المحاوله الفاشله وما كانوش صاحيين لكن انا رجعته تانى كرمال حلاوه النصر اللى ربى نصرها لى وقلت ما يصحش انى اقطع عيشه بعد ماربنا مد فى عمرى لان دى مش اخلاق القريه
ومش هانساله انه حتى لو المره دى جلت منه كانت ضبطت معاه قبل كده وتقدروا تسالوا النبوى عن محاولات الاغتيال الكتيره اللى احبطها وانا بقول له اتكلم يا نبوى وقول للناس عن محاولات اللى اتضبطن قبل كده بلاش النبوى ,
احكى ليكم انا فيه متامرين حاولوا اغتيالى وتدمير مصر 38 مره , 38 مره يا شعب مصر , 8 محاولات شيوعيه و 11 محاوله ليبيه و 9 محاولات من دول الرفض و 9 محاولات متطرفه ومره ايران وتمانيه واحداشر وتسعه وواحد يبقى 38 محاوله
وربنا بيحفظ مصر فى كل مره وعشان تبقوا عارفين المخابرات الليبيه عملت محاوله فى سبتمبر عام 81 وسموها عمليه جون كينيدى ( ايوه بتاع امريكا ) وجندوا واد من قنا واتمسك
والنبوى قال لى وانا فى المعموره حكايه الواد والبندقيه اللى عايز يقتلنى بيها زى ما اتقتل جون كينيدى , كينيدى مين يا حبيبى فاكرينى كروديا احنا مش فى تكساس انا فى مصر بلد الامن والامان
يومها قلت لجيهان القذافى كان عايز يقتلنى بالبندقيه ديه يا جيهان وكنت عايز اعملها فى متحف ,
القذافى دون اللى اعلن عن مسئوليته عن المحاوله الفاشله اللى كان فاكرها نجحت , كفايه انه فى يوم من الايام وصل فيه الاسفاف انه يلسن بالكلام على اهل بيتى مع انه كان ابن من ابناءى لما كان بييجى مصر واستضيفه فى بيتى ومع زوجتى واولادى وكان يعامل معامله كانه واحد من العيله وهو يعلم هذا لكنه رجل مريض وسياتى الوقت المناسب لنقول كل شىء عن هذا الرجل .
قبل كل ده فى مايو عام 81:
مسكوا فلسطينى جاى من سوريا ومعاه راديو كاسيت اه بيجيب اف ام يا خفيف كان فيه ديناميت يعنى تشغل الشرق الاوسط تلاقيه ولع بيك ..
وقبل كده برضه جه تليفون من الدكتور كرايسكى للدكتور على السمان صديقه قبل ما اسافر امريكا باسبوعين فى الرحله اللى فاتت دى علطول ,
وقاله ان عنده معلومات ان فى محاوله لاغتيالى وانا فى الزياره وبرضه ما همنيش .... انا كنت عارف ان راسى مطلوبه بس مؤمن ان الاعمار بيد الله الوحيدين اللى كنت بخاف عليهم هم اولادى
مره عثمان احمد عثمان قاللى بعد زياره المنصــــــوره , من اللى كنت باقابل فيها شعبى ,
نهدى شويه يا ريس قلت له انت عبيط يا عثمان , عمر الانسان محدد وساموت فى اللحظه التى يشاء لى ربى ان اموت فيها وانا كنت رايح المنصه وانا عارف ان العيال حسب كلام النبوى بقت خطوطهم مقطوعه خاصه بعدما هددت الواد الزمر فى خطابى
وعشان كده ما رضشت البس القميص الواقى بتاعى قلت لهم ايه الكلام الفارغ ده انا وسط ولادى .....
ودى فرصه بقى عشان احكى لكم اللى حصل بالضبط لاننى سمعت كلام كتير من المغرضين ان انا كنت مذهول وضربت لخمه وقلت مش معقول ( شفتوها طبعا على لسان احمد زكى ) وغير ده من الكلام الفاضى ,
وان اولادى جروا ونزلوا تحت الكراسى انا مش هنكر ان بعضهم عمل كده فعلا لاننا فى بلد مؤمن والكداب بيروح النار ( مش الاغنيه صحصحوا ) هو اللى حصل من ولادى طعبعا كان تصرف غريزى وبيحصل فى احسن محاولات الاغتيال لكن كله كوم وان حد يتكلم عن شجاعه قلب السادات او يشكك فى رباطه جاشه فده كوم تانى خالص ,
اللى بيتكلموا دول نسيوا انهم بيتكلموا مع السادات اللى شاف الهوايل ومن هو صغير اللى حصل انى انا كنت بتفرج ع الطايرات وفرحان بجيشى العظيم او لما لقيت العربيه اللى وقفت من بين الطابور وناس بتنط منها وصوت رصاص عرفت ان ساعه المواجهه مع اعداء شعبى جات وقفت بكل شجاعه
والحمد لله ولما اول واد من العيال الاندال اللى هيحصل القصاص منهم قرب منى وجت اول رصاصه فى صدرى .........
صرخت بكل صوتى وقلت له ازاى يا واد انت ترفع سلاحك على ابوك انت اتجننت ياض
ازاى تحاول تقتل الريس المؤمن اللى ارسى دعائم دوله العلم والايمان ,
الواد والعيال اللى معاه اصيبوا بذهول ولمحت فى عينيهم الندم كان هو مذهول والدم نازل منى وانا واقف بكل شجاعه وثبات ..
وكان ممكن ربنا يعدى الامور على خير لولا الرصاصه الغدر اللى انا عرفت جات منين
والكلام ده يحكيهولكوا كبير الياوران وسمير حلمى والانبا صمويل الله يرحمهم وفوزى عبد الحافظ ووجدى اسعد رئيس امن الرياسه اللى لسه فى المستشفى
المهم عشان ما افوتكوش فى الكلام لما الرصاصه دخلت رقبتى وانا بقع على الارض لقيت نور بين السما والارض وصوت بيقوللى .. شعبك لسه عايزك يا انور .. اجمد .. والحمد لله ادينى واقف بين شعبى النهارده
وربنا وفق رجالتى انهم يعلنوا قرار ان يوم 29 اكتوبر يبقى اسمه عيد النجاه تحتفل بيه مصر كل سنه
والعاملين فى الدوله ياخدوا اجازه رسميه ويفسحوا العيال ويودوهم القناطر الخيريه وجونينه الحيوانات
ويقولوا لهم النهارده يا ولاد اتكتب لمصر عمر جديد لان اللى حصل ما كنش هيتضر فيه حد غير مصر
باجى بقى للناس اللى شتمت قبل ما تنجلى الحقيقه ودول ناس ما عندهمش اخلاق القريه اللى اتعلمنا فيها ان ما فيش شماته فى الموت
وانا بتكلم هنا عن رؤساء دول الرفض اللى مسميين نفسهم قال ايه الصمود والتصدى اللى ملوا اذاعتهم اغانى وافراح ...
وعن بتوع الدقون اللى قعدوا يكبروا ويهللوا ويقولوا هلك الهالك .. طب اما نشوف مين الهالك ومين اللى هيهلك
ولا الواد اللى اسمه عادل عيد اللى هتف فى السجن مع الافنديه الارازل وقال تحيا مصر من غير ما يعرف ايه اللى كان هيحصل لمصر لو لا قدر الله والشر بره وبعيد كان حصل اللى حصل
هم قالوا لى ان هيكل عيط فى السجن لما سمع الخبر بس انا ما صدقتش قلت لهم ان ديه دموع الفرح وان ما كانتش تبقى دموع التماسيح ده هيكل
ولويس التاسع عشر وشويه الارازل اللى معاهم اكتر ناس تفرح فيا وكفايه الواد الشاعر البزىء اللى اسمه نجم اللى طلع بالاغنيه حاقده يقول فيها لا اله الا الله مات الندل وموت دواه .. انا ندل يا حقير فى حد يشمت فى الموت هى دى اخلاق القريه .. احنا عمرنا ما كنا كده ده بيشمت فيا لانه ملحد
والراجل الاعمى امام اللى معاه ده انا عطفت عليه وما طمرش فيه معقوله يعمل كده ولا قالوا لى عليهم انهم بيصلوا صلاه الشكر فى السجن لما سمعوا الخبر ملاحده وبيصلوا .. على راى المثل يعملوها ويخيلوا ..
باجى بقى للى قالوه العيال اللى حاولوا ينفذوا المؤامره
واد منهم اسمه عبد الحميد قال انه حاول يقتلنى عشان الدوله فيها مفاسد وخمور وربا وان الحكومه كافره
وواد تانى اسمه عطا قال انى بحكم بالديمقراطيه اللى هى كفر وانه اخد ثقافته من كتب وخطب كشك والمحلاوى
والتالت اللى اسمه حسين قال انه حاول يقتلنى عشان انا شتمت المحلاوى وقلت عليه مرمى فى السجن زى الكلب وانى قلت عن حافظ سلامه انه مجنون وشتمت النقاب وقلت عليه خيمه وان انا ظالم , انا ظالم يا حسين .. طيب طيب .. ماشى يا حسين .. انا بقى هوريك الظلم على اصوله يا حسين عشان تعرف الفرق بين الظلم والعدل ..
الراس الكبيره بتاعتهم خالد الاسلامبولى شبهنى بالتتار وجنكيز خان وان انا ما بالتزمش بكتاب الله .. بذمتكوا انا كده .. طب انا مافيش حد بيعشق صوت الشيخ رفعت قدى .. انا اللى شعبى باحساسه الوطنى لقبنى بالرئيس المؤمن ,
وكلكوا عارفين انا ايه اللى عملته للدين مقارنه باللى كان موجود فى ايام جمال _ الله يرحمه بقى مش عاوز اتكلم واجيب فى سيره الاموات لانه الحقيقه جالى فى المنام وهنانى بنجاتى وانا مش هقدر انسى له الموقف الجميل ده .
ما علينا المهم بمناسبه حكايه الدين دى انا اذكر فيما اذكر اننى قلت للدكتور البرى ان بيشغلنى اوى ان كلمه الاسلام اصبحت مخيفه للناس وان الخمينى اساء الى الاسلام فى الخارج , والجماعات اللى بتسمى نفسها الاسلاميه اساءت للاسلام فى الداخل
ومسؤليتنا نرسم صوره طيبه صحيحه للاسلام وعايزين نجتمع كل اسبوع علشان نطلع بيانباسمى للشباب المسلم والمسيحى كلهم اولادى عشان اوضح لهم خلاصه سياستى وتجاربى فى الحياه واربط المبادىء والقيم بما جاء فى الاسلام والمسيحيه ,
هم بس زعلانين ان اللى انا قبتع صح ومافيش اى تناقض بينه وبين دوله العلم والايمان اللى دعيت لها .
عموما كل دوله هتسمعوا اخبارهم قريبا عملاء دول الرفض وبتوع الدقون والارازل والملاحده وانا باعلن من هنا عن انشاء محكمه كل من ينجرف عن الجبهه الوطنيه وسيحاكموا طبعا محاكمه عادله .
احنا زى ما قلت ما بنتدخلش فى القضاء واحب اعلن عن خبر كويس بالنسبه للموقف الخارجى الحمد لله ربنا هيتوب علينا من قرب الصراع العربى الاسرائيلى والحمد لله انه هدى سر اخوانا
عرفات بتاع فلسطين اللى غلبت اقول له يا ياسر الناس زهقت حروب وقرف وعايزه تعيش وتتستر وتاكل لقمتها بعرف جبينها ,
ما اخبيش عليكوا عرفات اتصل بياوقال انه موافق على اجراء مفاوضات مع امريكا واسرائئيل وبيطلب وساطتى فى الموضوع وطلب منى انه يكون سر لكن انا ما اخبيش على شعبى
اى حاجه وقريب هيبقى فيه خطوات جاده عشان نخلص من الفيلم ده ونستريح وانا قلت الكلام ده من زمان ... ان لو قدرنا تكون علاقتنا بامريكا احسن من الحجم العادى يكون احسن ليه ؟
لاننى انا اؤمن بان لا مصلحه لنا فى عداوه دوله كبرى كامريكا اطلاقا وانا ماكنتش عايز اقول ان المؤامره اللى اتعرضت لها كانت تدبير من الاتحاد السوفييتى لكن ادينى قلت وياللا ,
خللى الامور تتضح .. وامريكا هى اللى كشفت لى ده بالوثائق والمستندات وانا فاكر لما جانى كسينجر وعملنا النقاط الست حذرنى بس انا افتكرته بيبالغ وانا دلوقتى شايف ان ربنا وفقنا فى قرار السلام وعايز اسال ...
اراده مين اللى كانت وراء هذا القرار غير ثقتنا احنا فى انفسنا ما نخشى شىء بتكلم مع اى حد لا ان احنا بنملك فى اى وقت نقول اه ونقول لا .. لمصلحه القضيه والمصالح العامه والسنين اللى حاربنا فيها كنا بنصرق من لحمنا الحى ومافيش اللى بنقول عليه فى الفلاحين الخميره والخميره خلصت رخره وعشان كده كان لابد من الانفتاح الاقتصادى ..
والحمد لله احنا مستمرين وقريبا هتسمعوا اخبار كويسه عن توسيع دور القطاع الخاص وتطهير القطاع العام اللى بقى تكيه ..
وما تخافوش كله ياكل ويتبسط بس لو اشتغل خلاص مش هيتكرر اللى كان بيحصل ايام جمال الله يرحمه
دا كان زمان تهريج زمان ومزايدات زمان النهارده المواقف متحدده وانا بقول ده للصحافه اللى عندنا
وللاسف يا اما سلبيه يا اما من تحت بتحدف كلام بلا مسؤليه اطلاقا انا بحكى لكم اصلى بانفس عن المعاناه بتاعتى انا سبت كل حاجه سبت الفتنه الطائفيه ماشيه سبت الطلبه الجامعات يهوهوا ويعملوا مظاهرات وصحف حائط وشتايم وتصفويه وانهزاميه وقالوا فى محمد انور السادات ما قال مالك فى الخمر وسبت ده كله لكن دلوقتى خلاص فاض الكيل الديمقراطيه لها انياب هتوجع كل اللى يهز الاستقرار ولن ارحم وانا بقول للصحفيين اللى بره واللى جوه كفايه بقى تعبتونى وسواتوا سمعتى وسمعه بلدكم
انا ما يهمنيش اللى بيتكلم فى حاجه انما ليه يسواوا سمعه بلدهم ؟
وانا قبل كده شيلت 120 صحفى ما وديتهمش على مؤسسات الدواجن زى ما حصل قبل كده ولا وديتهم الاستعلامات
وما قطعتش عيشهم انا بس كان عقابى ادبى لانه عيب وانا بقول لهم لموا نفسكم ليه ؟
لا ن انا فى موقف محتاج لكل انسان فى البلد يقف معانا ويقف مع بلده وانا باعلن عن تشكيل محكمه اسمها محكمه السلطه الرابعه عشان تحل مشاكل دى ..
وانا بقول للناس احنا مش على رجلين الروس زى حزب البعث السورى احنا مالناش غير ارادتنا وغير اخلاق القريه القريه بتدى مناعه , بتدى اصاله بتحمى الانسان , الصلابه اساسها القريه وانا ما كنتش اقدر اخرج من المؤامره دى سليما من غير اخلاق القريه يمكن اللى زاد اخلاق القريه عندى قوه هى الظروف اللى اتعرضت لها , المحنه , محنه التشريد والمعتقل زى ما قالوا فى حكمه كبير جدا , لايبنى الامم العظيمه الا الالام العظيمه
وانا والحمد لله عشت العديد من صنوف الالام طول حياتى انا اذكر فيما اذكر .
اول ما جيت القاهره من القريه نزلت اشترى من البقال اللى قدام بيتنا نزلت اشترى كبريت فى القريه عندنا ما نقولش كبريت نقول علبه كسفريت قلتله هات علبه كسفريت ,
الاولاد الارازل واقفين حوليا هاجوا من الضحك عليا , والبقال قال ماعنديش كسفريت انا استغربت ايه الحكايه طيب ؟
قالوا ده اسمه كبريت وظللت مصرا على ان اسمه كسفريت برغم تهريجهم وضحكهم عليا ,
انا بقول الحكايه دى عشان تعرفوا كلكم ان انا مش بتهز , وكسفريت يعنى كسفريت , وسلام يعنى سلام , وانفتاح يعنى افتاح ,
وانا بفكر انقل مقر العاصمه لميت ابو الكوم عشان نرسخ اخلاق القريه ونبعد عن اخلاق الانحطاط والزحام ,
واصدرت قرارا بالغاء العروض العسكريه خلاص والغاء الاحتفال بالسادس من اكتوبر
مش خوف لا سمح الله وانما لان الباب اللى ييجى لك من الريح سده وايه واستريح ..
وهاصرف علاوه للموظفين اسمها علاوه بركه انك بخير ..
وهاقف ضد ايه محاوله لاستخدام الديمقراطيه للعبث بمصلحه الوطن حتى لو اضطريت لتحويل مجلس الشعب الى مجلس محلى
ويبقى بالتعيين وهاعمل استفتاء على كل ده خلال الايام المقبله .
وانا عارف انكو توقفوا جنبى فى اى قرار اخده عشان مصلحه مصر .
انا طولت عليكوا لكن انا كان لازم احكى واقول لكم كل اللى فى قلبى , وعايزكم تعرفوا وتفهموا كويس قوى ان محمد انور السادات رئيسكم المحبوب المنتخب اللى بتفدوه بارواحكم وبقلوبكم مش بخاف من حد بيخاف من ربنا وبس
واختم خطابى بالدعوه الى ان يتقهقر الحقد ليحل محله الحب فلا يمكن ابدا ان نعيش فى مجتمع الحقد والى ان نقف صفا واحدا فى وجه كل من يحاول النيل من هذاالوطن .
وان تكون هذه المحاوله الاثمه هى الاخيره باذن الله عز وجل
ربنا لاتزغ قلوبنا بعد ان هديتنا وهب لنا من لدنك رحمه انك انت الوهاب
والسلام عليكم ورحمه الله وبركاته